Elbasy týraly kóshpeli kórme Japonııaǵa jol tartady
Kórme ıadrolyq qarýsyzdandyrý máselesi men Qazaqstan tarıhyna arnalmaq.
«Elbasy qyzmeti týraly kóshpeli kórme jobasyn alys-jaqyn elderdiń nazaryna usynǵymyz keledi. Bıylǵy jyldyń josparynda Japonııa da bar. Onda Nursultan Nazarbaevtyń ıadrolyq qarýsyzdandyrý salasyna sińirgen eńbegin kórsetkimiz keledi. Kóshpeli kórme shamamen 2019 jyldyń qazan aıynda Tokıo nemese Hırosıma qalalarynda ótedi. Alys saparǵa el óńirlerindegideı keshendi kórme apara almaýymyz múmkin. Eń qajetti ári mańyzdy materıaldar iriktelip jatyr», - dedi Elbasy Kitaphanasynyń dırektory Ámirhan Raqymjanov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, Elbasy kitaphanasynyń aýqymdy jobalarynyń biri - «N. Nazarbaev: dáýir, tulǵa, qoǵam» kóshpeli kórmesi 2017 jyldan beri júzege asyrylyp keledi. Eki jarym jylda kórmeler Almaty, Túrkistan, Atyraý, Aqtóbe oblystarynda jáne Almaty qalasynda ótti, bul kórmelerdi 730 myńnan astam adam tamashalaǵan. Aldaǵy 5-8 sáýir kúnderi kóshpeli kórme Qyzylorda qalasynda ashylady.
«Kóshpeli joba tek qana kórme qoıýmen shektelmeıdi. Ol aımaqtyq kásibı sessııa, taqyryptyq jáne sholý ekskýrsııalary, sheberlik sabaqtary, semınar-trenıngter, alys-jaqyn shet el ǵalymdardyń qatysýymen ótetin halyqaralyq ǵylymı konferentsııalardy qamtıdy. Basty ıdeıa - óńir turǵyndaryna osy bilimdi jetkizý. Memleketimizdiń kúrdeli joly týraly - ótken ǵasyrdyń 90-jyldaryndaǵy bos azyq-túlik sórelerinen qazirgi turaqty áleýmettik-ekonomıkalyq damýǵa deıin aıtý. QR Tuńǵysh Prezıdenti - Elbasy Nursultan Nazarbaevtyń táýelsiz Qazaqstannyń taǵdyryndaǵy rólin kórsetý», - deıdi Ámirhan Raqymjanov.
Joba aıasynda elimizdiń ár aımaǵy myńǵa jýyq jádigermen, atap aıtqanda, Elbasy kitaphanasyndaǵy arhıv, kitaphana, mýzeı qorlarynyń materıaldarymen tanysady.
«Kóshpeli kórmeniń artyqshylyǵy - onyń aıasynda kópshilik nazaryna usynylatyn jádigerlerdi Nazarbaev ortalyǵy kelýshileriniń ózi kúnde kóre almaıdy. Osy oraıda aımaq turǵyndarynyń tyń, mańyzdy jádigerlermen tanysýda «joly» bolyp tur. Máselen, halyq arasynda kóp taraǵan Nursultan Nazarbaevtyń aq-qara sýreti túpnusqada usynylady. Ol sýretti armıan prezıdentiniń jeke fotosýretshisi Davıd Akopıan 2017 jyly Sochıde ótken TMD kóshbasshylarynyń sammıtinde túsirgen. Sonymen birge, RF Prezıdenti Vladımır Pýtın syılaǵan «Şelkýnchık» baletiniń saryny boıynsha zergerlik kompozıtsııasy, Nur-Sultan jáne Qazaqstan Mıtropolıti Aleksandrden «Rojdestvo Hrıstovo» Tseretelı pannosy jáne Rım Papasy Frantsıska syılaǵan «Záıtún butaǵy» kompozıtsııasy bar», - dep atap ótti Á. Rahymjanov.
Tuńǵysh Prezıdenttiń joǵary memlekettik marapattarynyń toptamasy kelýshilerdi erekshe qyzyqtyrady.
«Mysaly, «Áýlıe apostol Andreı Pervozvannyı» ordeni - Reseı Federatsııasynyń joǵary nagradasy. 17 ǵasyrda bekitilgen alǵashqy reseılik marapatpen ár kezeńde Napoleon Bonapart, Aleksandr Sývorov, Mıhaıl Kýtýzov, Petr Bagratıon marapattalǵan. Bul ordenmen N. Nazarbaev Reseı men Qazaqstan arasyndaǵy dostyq pen yntymaqtastyqty nyǵaıtýǵa qosqan jeke zor úlesi úshin marapattaldy. «Pıı ordeni» - Vatıkan memleketi men Qasıetti Taqtyń eń joǵary nagradasy. Atalǵan nagradamen álemde 15 tulǵa ǵana marapattalǵan. Marapattardyń túpnusqasy arqyly otandastarymyz tek qana Qazaqstannyń órkendeýi men gúldenýine emes, álemniń damýy men jahandyq beıbitshilikke de qosqan Elbasynyń asa qundy úlesin sezinedi», - dep óz sózin jalǵastyrdy kitaphana basshysy.
Memleket basshylarynyń, belgili ǵylym, mádenıet jáne óner kórnekti qaıratkerleriniń qoltańbasy bar tartýlary Elbasynyń bedeli men álemdik tanýyn dáleldeı túsedi. Bul kitaptar kóshpeli kórme ekspozıtsııalarynda usynylady.
