Elbasy týraly árbir kitapqa eń aldymen eltanýdyń tutastaı bóligi retinde qaraý kerek - S. Abdrahmanov
ASTANA. QazAqparat - Elbasy týraly árbir kitapqa eń aldymen eltanýdyń tutastaı bóligi retinde qaraý kerek. Búgin Elbasy N. Nazarbaevtyń ómiri men qyzmetine arnalǵan «Nursultan Nazarbaev: Chelovek ý vlastı» atty kitaptyń tusaýkeseri barysynda sóz sóılegen «Egemen Qazaqstan» respýblıkalyq gazeti» AQ prezıdenti Saýytbek Abdrahmanov osylaı aıtty.
«Elbasy týraly árbir kitap - eń aldymen eltanýdyń tutastaı bóligi. Biz Elbasyny tanyǵan saıyn elimizdi tanı túsemiz. Óıtkeni, Elbasy N. Nazarbaev búgingi tańda «Qazaqstan» degen sózdiń balamasyna aınaldy. Búkil álemde Qazaqstan degen uǵym Nazarbaev esimimen tikeleı baılanystyrylady. Sondyqtan da, biz Elbasyn kóbirek bilgen saıyn ózimizdiń elimizdi de kóbirek bile túsemiz. Ózimizdiń elimizdi kóbirek bilgen saıyn, memleketimizdi baǵalaı túsemiz. Memleketti baǵalaǵan saıyn otanshyldyǵymyz arta túsedi. Otanshyldyǵymyz artqan saıyn bizdiń erteńgi kúnge senimimiz artyp, táýelsizdigimiz de nyǵaıady», - dedi Saýytbek Abdrahmanov.
Onyń aıtýynsha, Nazarbaevqa arnalǵan jańa týyndy shyn máninde eldigimizdi eńselendiretin eńbek. Onyń ústine bul eńbekte qalyptasqan memlekettiń strategııalyq baǵytynyń baǵdaryn aıqyndaǵan iri geosaıası ózgerister aıasynda memleket qurý kezindegi Qazaqstannyń birinshi basshysynyń tájirıbesine taldaý jasalady.
«Kitap avtorlary táýelsiz Qazaqstannyń negizin qalaýshy Elbasynyń reformatorlyq baǵytyn is júzinde júzege asyrýmen baılanysty aýqymdy máselelerdi qarastyryp otyr. Sonymen qatar, eńbekte KSRO ydyraǵan tustaǵy Qazaqstannyń ahýalyna tereń taldaýlar jasala kele, Elbasynyń sol kezdegi óte kúrdeli tarıhı qatermen betpe-bet kelgenine nazar aýdartylady. Shyndyǵynda, KSRO sekildi alyp odaqtyń kúıreýin sol tusta Jerdiń meteorıdpen soqtyǵysýyna balaýǵa bolatyn edi. Al ondaı qasań jaǵdaıda tóteden jol sala, sol joldyń durys tańdaýyn jasaı bilý kez kelgenniń qolynan kelmeıtin sharýa», - dedi S. Abdrahmanov.
«Úlken aýqymdy materıaldar qamtylyp, zor taldaýlar jasalǵan. Eń bastysy úlken sharýa atqaryldy, qaı jaǵynan alyp qaraǵanda da úlken tartý bolyp otyr», - dedi ol.
