Elbasy týraly «Álemge! Ǵaryshqa! Bolashaqqa jol ashqan Tuńǵysh!» atty kitap jaryq kórdi
KÓKShETAÝ. QazAqparat - QR Tuńǵysh Prezıdenti kúni qarsańynda Kókshetaýda «Álemge! Ǵaryshqa! Bolashaqqa jol ashqan Tuńǵysh!» atty kitabynyń tusaýkeseri ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Kitaptyń avtory - tanymal jýrnalıst, dramatýrg, qoǵam jáne saıasat qaıratkeri, 5-shi shaqyrylǵan Qazaqstan Respýblıkasy Parlamenti Senatynyń depýtaty Jabal Erǵalıev.
Aqmola oblysy ákimdiginiń qoldaýymen «Rýhanı jańǵyrý» baǵdarlamasynyń aıasynda jaryq kórgen kitap Qazaqstan Respýblıkasynyń Tuńǵysh Prezıdenti N.Á.Nazarbaevqa arnaldy.
Bul mańyzdy oqıǵany jazýshymen bólisýge onyń áriptesteri, óńirdiń shyǵarmashylyq jáne ǵylymı ıntellıgentsııa ókilderi keldi.
Kitaptyń avtoryn Aqmola oblysynyń ákimi Málik Myrzalınniń atynan orynbasary Aına Mysyrálimova quttyqtap, Táýelsiz Qazaqstannyń tarıhy men memleket basshysynyń taǵdyry - barlyq halyqtyń taǵdyry ekenin atap ótti.
«Álemdik arenada eldiń bedeliniń ósýi, qazaq halqynyń táýelsizdigine qol jetkizý Qazaqstan Respýblıkasynyń Tuńǵysh Prezıdenti Nursultan Nazarbaevtyń esimimen baılanysty», - dedi Aına Mysyrálimova.
Barlyǵy 488 bettik basylym úsh bólikten turady. Birinshisi J.Erǵalıevtiń maqalalary. Ekinshi taraýda - memleket basshysy N.Nazarbaevtyń qatysýymen qazirgi zamanǵy Qazaqstannyń tarıhyndaǵy jarqyn kezeńderdiń biri beınelengen. Olardyń ishinde BUU Bas Assambleıasynyń sessııasynda, Álemdik dinder sezderin uıymdastyrýda, Astanadaǵy EQYU sammıtinde sóılegen sózderi bar.
Avtor óz kitabynda Elbasynyń Qazaqstan halqyna Joldaýynyń mańyzdylyǵyn, bıliktiń aldynda turǵan mindetterdi jáne osy baǵdarlamalyq qujatty júzege asyrýdyń qoǵamǵa jáne ekonomıkaǵa ákeletin artyqshylyqtaryn kórsetti. Kitaptyń úshinshi bólimi - halyq pen Elbasy týraly oılar men pikirler.
Jabal Erǵalıevtiń kitabynyń alǵashqy ıegeri M.Jumabaev atyndaǵy oblystyq ámbebap ǵylymı kitaphana atandy. Kitaphananyń qoryn avtordyń óz qolynan tabystalǵan 20 kitaby tolyqtyrdy.
