Elbasy Tımýr Qulybaevty qabyldady

ASTANA. QazAqparat - Elbasy «Atameken» ulttyq kásipkerler palatasy prezıdıýmynyń tóraǵasy Tımýr Qulybaevty qabyldady, dep habarlaıdy Aqordanyń baspasóz qyzmeti.

Kezdesý barysynda Memleket basshysyna «Atameken» ulttyq kásipkerler palatasynyń qazirgi qyzmeti jóninde málimet berildi.

Nursultan Nazarbaev shaǵyn jáne orta bıznesti qoldaýdyń mańyzdylyǵyna toqtalyp, bul baǵyt boıynsha memleket qabyldaǵan sharalardyń nátıjelerin atap ótti.

«Sońǵy kezde biz quqyq qorǵaý jáne jergilikti organdar tarapynan shaǵyn jáne orta bıznesti qoldaýǵa arnalǵan kóptegen mańyzdy sheshimder qabyldadyq. Munyń ishinde shaǵyn nesıe berý máselesi de, jurtty bızneske úıretý máselesi de bar», - dedi Qazaqstan Prezıdenti.

Memleket basshysy «Atameken» ulttyq kásipkerler palatasynyń aımaqtardaǵy is-qımylymen, onyń ishinde jurtshylyqqa bıznes júrgizý negizderin úıretý salasyndaǵy jumystarymen tanysty.

«Biz ótken jyly «Bastaý» baǵdarlamasyn bastadyq. Bul - 30 kún ishinde aldyn-ala irikteý ótkizip, jurtqa bıznestiń álippesin uǵynýǵa múmkindik beretin aılyq oqý kýrsy. Ákimdiktermen birlesip, shaǵyn qarjy uıymdaryn quryp, bitirýshilerdi qarjylandyrdyq. Biz bul baǵdarlamany Úkimetke usyndyq jáne qoldaýǵa ıe boldyq. Bıylǵy jyly 1 mıllıard 200 mıllıon teńge bólindi. Baǵdarlama aıasynda elimizdiń 80 aýdanynda jumys júrgizip, 15 myń adamdy oqytatyn bolamyz», - dedi T.Qulybaev.