Elbasy tehnologııalyq tóńkeris alyp kelgen áleýmettik teńsizdik týraly aıtty
«Qazirgi tańda álemdegi eń baı 62 adamnyń aktıvteri jer jahandaǵy kedeı halyqtyń jartysynyń, ıaǵnı 3,5 mıllıard adamnyń tabysymen teńesti. Birqatar halyqaralyq sarapshylardyń málimetine súıensek, ótken jylǵy baılyqtyń 80 paıyzy - álemdegi halyqtyń 1 paıyzyna ǵana tıelisi bolyp otyr. Paradoks - biraq, adamdardyń ómirin jaqsartýy tıis tehnologııalyq tóńkeris teńsizdiktiń jańa baǵyttaryna jol berip otyr. Osy máselelerdiń barlyǵyn sheshý úshin jańa tıimdi mehanızmdi qurýdyń, memlekettter arasyndaǵy dıalogty kúsheıtip, bilim almasýdy retteýdiń ýaqyty keldi», - dedi Nursultan Nazarbaev.
Sondaı-aq Prezıdent óz sózinde Global Challenges Summit 2018 forýmyn ótkizýdiń bastamasy nelikten kóterilgenin túsindirdi.
«Global barlyq memleketterdiń múddeleri men pikirlerin úılestire alady. Global úılestirilgen sheshimderdi daıyndaýda naqty áreket etetin qural bola alady. Máselen, osy alańda kelesi taqyryptardy talqylaýǵa bolady. Birinshiden, turaqty damý máseleleri, kedeılikpen, ashtyqpen kúres, sý tapshylyǵy máselesi, ekologııalyq apattarǵa qarsy kúres. Ekinshiden, ekonomıkalyq teńsizdikti qysqartý, tabystar arasyndaǵy aıyrmany tómendetý, álemdegi áleýmettik ál-aýqatqa teń dárejede qol jetkizý. Osy rette ekonomıkalyq ósimdi ǵana emes, adamdardyń ómir sapasyn jaqsartýǵa baǵyttalǵan metodologııany ázirleý mańyzdy qadam bolar edi», - dedi Memleket basshysy.
Memleket basshysy úshinshiden, halyqaralyq saýda kontýrynyń jańa erejelerin ázirleýdiń ýaqyty kelgenin aıtty.
«Tórtinshiden, jalǵan aqparattardyń taralýyn jan-jaqty talqylaý kerek. Jalǵan aqparattardyń taralýy memleketter men ulttar arasyndaǵy kelispeýshilikti týyndatady. Úkimet, azamattyq qoǵam ınstıtýttary, BAQ óziniń jaýapkershiligi turǵysynan bir kelisimge kelýi kerek. Besinshiden, krıptolvalıýtalardy retteý jumysy. Kóptegen memleketter krıptovalıýtany qarjylyq júıelerdiń aǵymdaǵy konfıgýratsııasyna beıimdeýdi oılastyryp jatyr. Bul rette ortaq ereje qurýdy bastaý kerek. Aıta keterligi, Global bastamasynda bul rette sarapshylyq jáne ınstıtýtsıonaldyq qoldaý bar. Halyqaralyq uıymdardyń tarapynan ol G20 sammıtinde birneshe ret aıtylǵan bolatyn. Ótken aptada ǵana - 8 mamyrda Islam yntymaqtastyq uıymy Syrtqy ister mınıstrleriniń keńesi (50 memleket kiretin) bul bastamany qoldaýǵa baǵyttalǵan rezolıýtsııany qabyldady. Halyqaralyq birlestikterdiń aralasyp otyrǵanyn esepke ala otyryp, men osy bastamany BUU alańynda júzege asyrýdy usynamyn», - dedi Elbasy.
Eske sala ketsek, búgin Astanada Global Challenges Summit 2018 forýmynyń jalpy otyrysy bastaldy. Oǵan Qazaqstan Prezıdenti Nursultan Nazarbaev qatysýda. XI Astana ekonomıkalyq forýmy elordada 17-19 mamyr kúnderi ótedi.
