Elbasy táýelsizdik jyldaryndaǵy árbir oqıǵany boıynan ótkerip qabyldady – Aıda Balaeva
Fılmniń alǵashqy kórsetilimin avtorlarmen birge Aqparat jáne qoǵamdyq damý mınıstri Aıda Balaeva, Mádenıet jáne sport mınıstri Aqtoty Raıymqulova, «Qazaqfılm» aktsıonerlik qoǵamynyń prezıdenti Aqan Sataev, Májilis depýtattary jáne ózge de mádenıet pen óner maıtalmandary tamashalady.
Kórsetilimnen keıin fılmniń rejısseri Igor Lopatenok bastaǵan shyǵarmashylyq topqa qurmet kórsetildi.
«Bizdiń mádenı, rýhanı ómirimizde taǵy bir úlken joba iske asty. Táýelsizdigimizdiń 30 jyldyǵy qarsańynda árqaısymyzdyń tarıhymyz osy bir kishkentaı týyndyda kóz aldymyzdan ótti. Sondyqtan mundaı týyndylar kóp bolýy kerek dep oılaımyn. Óıtkeni bul – tanymdyq, úlken materıal. Týyndy Elbasymyzdyń táýelsiz Qazaqstannyń ósip-órkendeýindegi, qalyptasyp nyǵaıýyndaǵy rólin asa aıqyn kórsetip ótti. Sondyqtan mundaı týyndylardy tek ishki aýdıtorııaǵa ǵana emes, shetelde nasıhattap, kórsetý óte mańyzdy», - dedi Aqparat jáne qoǵamdyq damý mınıstri Aıda Balaeva kórsetilimnen keıin.
Mınıstr táýelsiz Qazaqstannyń taǵdyrsheshti oqıǵalarǵa toly aýqymdy tarıhynan fılm jınaqtap shyǵarý ońaı bolmaǵanyn atady.
«Shyǵarmashylyq topqa osy eńbegi úshin alǵys aıtqym keledi. Men bunyń óte aýqymdy materıal bolǵanyn, ony jınaqtaý óte qıynǵa túskenin bilemin. Óıtkeni táýelsizdik jyldaryndaǵy árbir sátti, árbir oqıǵany boıynan ótkizip qabyldaǵan Tuńǵysh Prezıdenttiń aýzynan shyqqan árbir málimet mańyzdy, qyzyqty boldy dep oılaımyn. Osynshama aýqymdy materıaldyń arasynan tamasha fılm yqshamdap alyp shyǵý – úlken eńbek. Fılm óte sátti shyqqan. Sondyqtan avtorlaryna alǵysymdy jetkize otyryp, ári qaraı da shyǵarmashylyq tabystarǵa jete berýdi tileımin», - dedi Aıda Balaeva.
