Elbasy Tashkentke saparyn tarıhı kún dep baǵalady

TAShKENT. QazAqparat - Ózbekstan prezıdentimen jıi kezdeýimiz strategııalyq seriktestigimizdi jaqyndatty. Bul týraly búgin Ózbekstan prezıdenti Shavkat Mırzıeevpen shaǵyn jáne keńeıtilgen quramdaǵy kelissózderden keıingi birlesken málimdeme jasaý barysynda Qazaqstan Prezıdenti Nursultan Nazarbaev aıtty, dep habarlaıdy QazAqparattyń arnaýly tilshisi Tashkentten.

«Men aldymen Ózbekstan prezıdentin jáne barsha ózbek halqyn bizderdi ystyq yqylaspen qabyldaǵany úshin zor rızashylyǵymdy bildiremin. Bizdiń joǵary dárejedegi kezdesýimiz ıgi dástúrge aınaldy. Shavkat Mırzıeev prezıdent bolyp saılanǵan beri bul elge resmı saparmen kelip otyrǵan  shetel basshysynyń eń birinshisi menmin. Bul Qazaqstan atyna kórsetilgen úlken qurmet bolyp sanalady», - dedi Qazaqstan Prezıdenti.

Memleket basshysy osy jyldyń ishinde ǵana Ózbekstan prezıdentimen besinshi ret kezdesip otyrǵandyǵyn atap ótti.

«Munyń bári eki  eldiń arasyndaǵy  qarym-qatynasty, jınalyp qalǵan  máselelerdi sheshý úshin qajet boldy. Bul bizdiń strategııalyq seriktestigimizdi jaqyndatty. Sondaı-aq elderimizdiń arasyndaǵy  qarym-qatynasty damytýǵa barynsha mán berilip otyr. Osy kúnderdiń arasynda kóp másele sheshildi. Osy sapardy, kelisózderdi da eki eldiń arasyndaǵy tarıhı kúnder dep sanaımyn»,-  dedi Nursultan Nazarbaev.