Elbasy Tarazdaǵy jańa jol ótkelindegi qurylys jumystarymen tanysty
Búginde Taraz qalasy turǵyndarynyń jalpy sany 369 myńdy quraıdy. Onyń 100 myńy qala aýmaǵymen ótetin temir jol jelisiniń arǵy betinde turady. Qazirgi tańda qalanyń osy eki bóligi arasynda kólik qatynasy Abaı kóshesinde ornalasqan jalǵyz jol ótkeli arqyly júrgizilip keledi. Sońǵy jyldary kólik qozǵalysynyń qarqyndylyǵy 2-3 esege ósip, qalanyń temir joldyń arǵy betindegi bóligimen qatynas ornatý qıyndap ketti. Oǵan qosa Qyrǵyzstan Respýblıkasy shekarasyndaǵy «Aısha bıbi» keden beketi baǵytynan qatynaıtyn kólik qozǵalysynyń qarqyndylyǵy táýligine 4-5 myń avtokólikke jetken.
Atalmysh máseleniń sheshimin tabý maqsatynda qurylysy ótken ǵasyrdyń 90 jyldary bastalyp, aıaqtalmaı qalǵan Aısha bıbi kóshesiniń aıaǵynda ornalasqan jol ótkelin jańǵyrtý jobasy qolǵa alyndy. Jalpy quny 1 917,311 mıllıon teńgeni quraıtyn jobany iske asyrýǵa 2016 jyly respýblıkalyq bıýdjetten 1 119,0 mıllıon teńge, 2017 jyly oblystyq bıýdjetten 709,1 mıllıon teńge bólindi. Jol ótkeliniń qurylysyn «Araıstroımarket» jaýapkershiligi shekteýli seriktestigi júrgizdi. Merdiger kompanııa ótken jyly kelisimshartqa saı bólingen 1 828,1 mıllıon teńge kólemindegi qarajatty tolyǵymen ıgerdi.
Qaıta jańǵyrtýdan ótken jol ótkeli paıdalanýǵa berilip, qalanyń temir joldyń arǵy betindegi bóligimen qatynasý ońtaılana tústi.
Jalpy Jambyl oblysynyń aýmaǵymen jalpy uzyndyǵy 1 237 shaqyrym bolatyn respýblıkalyq mańyzy bar avtomobıl joly ótedi. Sonymen birge, óńirde jalpy uzyndyǵy 495 shaqyrymdy quraıtyn «Batys Eýropa-Batys Qytaı» halyqaralyq tranzıtti dáliziniń qaıta jańartý jumystary da aıaqtaldy. Halyqaralyq avtojoldy jańǵyrtý jumystary kezinde 22 kópir, 15 jol ótkelderi, 643 sý ótkizý qubyry, 11 kóliktik jol aıryǵy salyndy. Qazirgi tańda «Batys Eýropa-Batys Qytaı» avtojolymen táýligine 7 500 kólik ótedi.
Sol sekildi oblys aýmaǵyndaǵy respýblıkalyq máni bar «Merki-Shý-Býrylbaıtal» avtojolyna qaıta jańǵyrtý jumystary júrgizilip jatyr. Atap aıtqanda, «Merki-Shý-Býrylbaıtal» avtomobıl jolynyń 7-273 shaqyrymy aralyǵyndaǵy joldardy sapasyna qaraı І jáne ІІ sanatty etip qaıta jańǵyrtýdan ótkizý josparlanýda. Jobany iske asyrý boıynsha «Kazdorproekt» jaýapkershiligi shekteýli seriktestigimen ázirlengen tehnıkalyq-ekonomıkalyq negizdeme memlekettik saraptamaǵa usynyldy.
