«Elbasy tapsyrmasynyń oryndalýy - Úkimet qyzmetiniń negizi» - respýblıkalyq basylymdarǵa sholý

***

Elimizdiń batys óńirine jumys babymen saparlaǵan Úkimet basshysynyń ekinshi kúni de asa qaýyrt bolǵanymen eń bastysy, óte jemisti boldy. Premer-Mınıstr Mańǵystaý oblysynyń Beıneý aýdanyndaǵy birqatar nysandarmen, Aqtaý teńiz portynyń keńeıtilgen jobasymen tanysty. Al oblys ortalyǵynda ótkizgen birqatar keńesteriniń qorytyndysynda naqty sharalar qabyldandy. Bul jaıynda «Egemen Qazaqstan» gazetiniń beısenbilik nómirinde jaryq kórgen «Elbasy tapsyrmasynyń oryndalýy - Úkimet qyzmetiniń negizi» degen taqyryppen berilgen maqalada egjeı-tegjeıli baıandalǵan. «Elbasy Nursultan Nazarbaevtyń áleýmet­tik-ekonomıkalyq damýdy ınten­sıvtendirý jáne halyqtyń turmys sapasyn jaqsartý jónindegi tap­syrmalarynyń oryndalýy Kárim Másimov kabıneti qyzmetiniń negizi ekenin eskersek, atqarýǵa tıisti ister de, sheshilýi qajet máseleler de az emes ekendigi anyq», dep jazady basylym.

Keshe Jeneva qalasynda Senat Tóraǵasy Qasym-Jomart Toqaevtyń basshylyǵymen el Parlamentiniń delegatsııasy qatysqan Parlament tóraǵalarynyń búkilálemdik úshinshi konferentsııasy aıaqtaldy. Bul týrasynda «Egemen Qazaqstan» gazeti Parlament Senatynyń baspasóz qyzmetine silteme jasap jarııalap otyr. Basylymnyń jazýynsha, alqaly jıynǵa qatysýshylar kópbeldeýli álemdegi kúrdeli ári tereń ózgeristerdi, memleketterdiń ekonomıkalyq kúsh-qýatyna qatysty jáne halyqaralyq ekonomıkalyq yntymaqtastyq jolynda oryn alyp otyrǵan túbegeıli betburystar aıasyndaǵy ekonomıkanyń jahandaný úrdisin, sonymen qatar, jahandyq qarjylyq-ekonomıkalyq daǵdarystyń ekonomıkalyq ósip-órkendeýge tıgizip otyrǵan keri áserlerin eskere otyryp, álemdik qaýymdastyq elderin atalǵan máselelerdi kópjaqty ózara is-qımyldary, eń aldymen, barlyq memleketterge derbes teńdikti kepildentiretin BUU arqyly birigip sheshýge shaqyrǵan.

Shildeniń 20-synda Qazaqstan ǵylymy aýyr qazaǵa dýshar boldy. Qazaqstan Respýblıkasy Ulttyq ǵylym akademııasynyń akademıgi, professor, kórnekti zańger-ǵalym Ǵaırat Saparǵalıev 81 jasqa qaraǵan shaǵynda dúnıeden ozdy. Osyǵan oraı «Egemen Qazaqstan» gazetiniń búgingi nómiri arqyly QR Ádilet, Bilim jáne ǵylym, Mádenıet mınıstrlikteri, Shyǵys Qazaqstan oblysynyń ákimdigi, Ál-Farabı atyndaǵy Qazaq ulttyq ýnıversıteti, QR Ulttyq ǵylym akademııasy, sondaı-aq elimizdiń tanymal ǵalymdary akademıkpen baquldasty.

***

Úkimet 2010 jyldyń bıýdjetin túzer kezde de, 2010-2020 ındýstrııalyq-ınnovatsııalyq damý baǵdarlamasyn jasar shaqta da elimizdiń qarjylyq áleýeti onsha jaqsy jaǵdaıda emes edi. Óıtkeni búkilálemdik qarjy daǵdarysy saldarynan dúnıejúzilik qor bırjalarynda bizdiń eldiń kirisiniń negizi sanalatyn - eksporttyq shıkizattar baǵasy meılinshe tómendep ketken bolatyn. Alaıda sońǵy kezderi naryqtaǵy bul shıkizattardyń baǵasynyń kóterilýi baıqalyp otyr. «Aıqyn» gazetiniń nazarynan tys qalmaǵan bul jaıt búgingi nómirde «Profıtsıtti búgin «úlestirsek» «2020» baıı túsedi» degen taqyryp aıasynda jan-jaqty baıandalǵan. Basylymnyń atap ótýinshe, dúnıejúzilik sarapshylar munaıdyń bareli jyl aıaǵyna deıin 90, al astyqtyń tonnasy 300 dollarǵa jetýi yqtımal degen joramalyn da alǵa tartady. Al metaldyń baǵasy qazirdiń ózinde 2007 jyldyń tamyzyna deıingi mólsherine jetip tur. «Qysqasy, Qazaqstannyń eksporttyq áleýeti sanalatyn barlyq ónimderimizdiń álemdik qor bırjalaryndaǵy baǵasy biz bıýdjet bekiterde qarastyrǵan mólsherden áldeqaıda joǵary bolatyny aıdan anyq. Sondyqtan da 2010 jyldyń memlekettik bıýdjetinde profıtsıt bolary sózsiz», dep jazady basylym.

«Shetel mýltfılmderi bala psıhıkasyn buzady». Osy taqyryppen «Aıqyn» gazetiniń beısenbilik nómirinde jaryq kórgen maqalada sheteldik pen keńestik, sondaı-aq otandyq mýltfılmderdi salystyra otyryp, sheteldik týyndylardyń bala psıhologııasyna keri áser etetin birqatar naqty sebepterin, olardaǵy kemshilikterdi, qatelikterdi jipke tizip shyqqan. «Shrektegi» qusty trol áıel óleń aıtyp jaryp jiberetin, onyń úsh jumyrtqasyn qýyryp jeıtin nemese qurbaqa men jylandy shar qylyp úrlep ushyryp jiberetin epızodty bárimiz bilemiz. Sonda bala sanasyn qorshaǵan orta men tabıǵatty aıalaý kerek degen oı qaıdan paıda bolsyn?!», dep jazady basylym.

«Astana kúni toıynda ótken merekelik kontsertterden túsken 10 mln. teńge qarjy qaladaǵy múgedek balalardy saýyqtyrýǵa jumsalady. Osyǵan oraı keshe elordanyń bes búldirshini elimizdiń jáne sheteldiń irgeli klınıkalarynda emdelýge qajetti qarjyny alý úshin arnaıy sertıfıkatqa ıe boldy», dep jazady «Astana Aqshamy» gazeti. Basylymnyń atap ótýinshe, qazirgi ýaqytta qalada 13200 múgedek adam tirkelse, onyń 1500-i búldirshinder eken.

«Astana aqshamy» gazetiniń jazýynsha, elordanyń aınalasyna otyrǵyzylǵan ormandy alqapta kóp uzamaı haıýanattar álemi damyp, týrıstik aımaqqa aınalmaq. Qala balansyna berilgen jasyl beldeýdiń jalpy aýmaǵy 16584 gektar. Onyń 9 mıllıonnan astam aǵash, al 2 mıllıonǵa jýyǵy jyńǵyl. Búginde jasandy toǵaıda qoıan, túlki, qarsaq syndy ańdar bar. Kúni keshe osy alqapqa 20 qyrǵaýyl jiberildi.

***

«Kazahstanskaıa pravda» gazetiniń jazýynsha, QR Kólik jáne kommýnıkatsııa mınıstri Ábilǵazy Qusaıynovtyń Qazaqstandaǵy Slovak Respýblıkasynyń Tótenshe jáne Ókiletti Elshisi Dýshan Podgorskımen kezdesýi barysynda yntymaqtastyq týraly memorandým jasasý qajettiligi máselesi basty taqyrypqa aınalǵan. Á.Qusaıynov atap ótkendeı, Qazaqstanda slovakııalyq kompanııalarda jumys tájirıbesi bar. Naqtyraq aıtqanda, kompanııa iri kólik aınalymy jobasyn engizgen «Astana - Býrabaı» birinshi avtobanynyń qurylysyn ataýǵa bolady. Qazirgi ýaqytta bul yntymaqtastyqty basqa da salalarda keńeıte túsýge bolady. Elimiz jol qurylysy, kadrlardy oqytý, daıarlaý jáne biliktiligin arttyrý, Qazaqstannyń kólik-logıstıkalyq jelisin qalyptastyrý, ushqyshtardy, azamattyq avıatsııa ınjenerlerin, sonymen qatar sý kóligi mamandaryn oqytý barysynda Slovakııaǵa qyzyǵýshylyq tanytady.