Elbasy tapsyrmasynan soń Úkimet ınfraqurylymdy órkendetýge basa nazar aýdarmaq

ALMATY. QazAqparat - QR Premer-Mınıstriniń orynbasary Erbolat Dosaev Almaty qalasynyń  aktıvimen kezdesti. Ol Prezıdenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan  halqyna Joldaýyn oryndaýdaǵy  Úkimettiń  aldaǵy atqaratyn jumystarynyń basty baǵyttaryn atady, dep habarlaıdy QazAqparat tilshisi qalalyq ákimdikke silteme jasap.

 Erbolat Dosaev óz sózinde,  eger buryn respýblıkalyq máni  bar ınfraqurylymdardy damytýǵa mán berilse, budan bylaı óńirlik  jáne qalalyq ınfraqurylymdardy  órkendetýge erekshe nazar aýdarylatynyn, al bul Almaty úshin óte  mańyzdy ekenin atap ótti.

«Keler jyldyń 1 qyrkúıegine deıin 2030 jylǵa deıingi aýmaqtyq - keńistiktik damýdyń Strategııasy jasalady, munda basqarylatyn ýrbanızatsııaǵa  aktsent beriledi. Halyqty ornalastyrý, óńirlerdiń arnaıy salalaryn anyqtaý, óndiristi damytý, ınfraqurylymdy qamtamasyz etý osy  prızma arqyly júzege asady, al bul el óńirlerinde kishi ýrbanızatsııanyń  qanat jaıýyna tyń serpin beredi. Túrli eldi mekender - aýyldar men respýblıkalyq máni bar qalalar úshin aımaqtyq standarttar júıesin jasaý josparlanýda, onda áleýmettik qoldaý men memlekettik qyzmet kórsetýdiń qoljetimdiligi  naqtyly aıqyndalady», - dedi Erbolat Dosaev.

Úkimet basshysynyń orynbasary óńirlerdi damytýǵa jańasha turpatta kelý qala turǵyndarynyń turmys sapasyn jaqsartyp, óńirlik ekonomıkanyń damýyna oń áser etetinin aıtty. Óńirlerdegi turǵyndardyń ómirin jaqsartý «Nurly Jol» jáne «Nurly Jer» syndy baǵdarlamalardy 2025 jylǵa deıin júzege asyrýmen tikeleı baılanysty.Tek Almatynyń ózinde ǵana jyl aıaǵyna  deıin 2 mln sharshy metr turǵyn úıdi  paıdalanýǵa berý josparlanǵan.

Mektep jasyna deıingi mekemelerde jáne mektepterde bilim berýdiń sapasyn arttyrý úshin bıylǵy jyldyń sońyna deıin Jol kartasy jasalyp, bekitiledi. Bul qujatta mektep jasyna deıingi mekemeler tárbıeshileriniń bilimin arttyrý jáne biryńaı biliktilik talaptary kórinis tabady, PIZA, SAT, AST syndy halyqaralyq standarttarǵa kóshý  iske  asady.

Bulardan ózge, mektepter qurylysyn eldi mekenderdiń damý josparlarymen sáıkestendirý tapsyryldy, al bul jeke sektor ınvestıtsııasy esebinen mektep qurylystaryn salý qarqynyn arttyrady.