Elbasy tapsyrmasyna saı 1 mln qazaqstandyq gazben qamtamasyz etiledi

NUR-SULTAN. QazAqparat - Qazaqstanda halyqty gazdandyrý deńgeıi 49,7 paıyzǵa jetti. Bul týraly OKQ-da ótken baspasóz máslıhatynda Energetıka mınıstri Qanat Bozymbaev málim etti, dep habarlaıdy QazAqparat tilshisi.

«Qazirgi tańda gazdy shamamen 9 mıllıon adam tutynyp otyr. Jyl saıyn gazdandyrýǵa bólinetin qarajat kólemi ulǵaıyp kele jatqanyn atap ótý kerek. 2019-2021 jyldar kezeńinde gazdandyrýǵa arnalǵan qarajat óńirlerdi damytý, «Nurly jer», sondaı-aq aǵymdaǵy jylǵy 27 aqpanda «Nur Otan» partııasynyń XVIII sezinde berilgen Elbasynyń jeke tapsyrmalarynyń sheńberindegi baǵdarlamalarda kózdelgen. Elimizdiń 13 óńirinde osy kezeńde 100-den astam joba iske asyrylatyn bolady», - dedi mınıstr.

Qanat Bozymbaev atap ótkendeı, Elbasy tapsyrmalaryn iske asyrý sheńberinde atalmysh jobalar 1 mln astam turǵyndy gazben qamtamasyz etýge múmkindik beredi.

Eske sala ketsek, keshe halyqqa esep berý kezdesýinde Qanat Bozymbaev joǵaryda atalǵan jobalar týraly aıtyp bergen edi.

«Saryarqa gaz qubyry kestege sáıkes salynyp jatyr. Qazirgi ýaqytta Jezqazǵan qalasyna jaqyn jerde dánekerleý jumystary júrgizilýde. Búgingi kúnge shamamen 420 km qubyr dánekerlendi. Bul jalpy gaz qubyrynyń 40 paıyzyn quraıdy», - dedi Qanat Bozymbaev.

Bas energetık elordamen birge, birinshi kezeńde Qaraǵandy, Temirtaý, Jezqazǵan, Sátbaev, Saran, Shahtınsk qalalarynyń 171 eldi mekeni gazben jabdyqtalatynyn jetkizdi.

«Atalmysh eldi mekenderdiń 142 myń turǵyny gazǵa qol jetkizedi. Jalpy, jyl sońyna deıin eldiń gazdandyrý deńgeıin 50%-dan asyrý kózdelip otyr», - dedi ol.