Elbasy tapsyrmasyn oryndaýǵa óndiris oryndarynyń múmkindigi jetedi - BQO ákimi
ORAL. QazAqparat - Elbasy tapsyrmasyn oryndaýǵa oblystaǵy óndiris oryndarynyń múmkindigi jetedi. Bul týraly búgin oblys aktıviniń jınalysynda óńir basshysy Altaı Kólginov málim etti, dep habarlaıdy «QazAqparat» tilshisi.
Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyn júzege asyrý máselelerine toqtalǵan oblys ákiminiń aıtýynsha, ónerkásiptik kompanııalar óndiriske tyń tehnologııalardy engizýi tıis. Buǵan olardyń múmkindigi jetedi. Óndiris oshaqtarynyń deni qazirdiń ózinde materıaldyq-tehnıkalyq jaǵynan jańǵyrtylyp, óndiris kólemin ulǵaıtýdy kózdep otyr.
Ekinshiden, Prezıdent tabıǵı baılyqty tıimdi paıdalanyp, soǵan oraı aqparattyq-tehnologııalyq tuǵyrnamalardy belsendi túrde engizý mindetin qoıyp otyr. Ásirese, balamaly energııa kóziniń úlesin 2030 jylǵa qaraı 30 paıyzǵa jetkizý kózdelýde. Bul rette Batys Qazaqstanda qolǵa alynǵan fındik tehnologııalar qurylys salasyna keń kólemde engiziletin bolady. «EKSPO-2017» halyqaralyq kórmesiniń alańynda bolǵan kelissózderdiń nátıjesinde qol jetkizilgen jańa tehnologııalar jasyl ekonomıkaǵa jol ashady. Oral qalasynda turmystyq qatty qaldyqtardy qaıta óńdeý jumystary júzege asyrylady. Sonymen qatar oblys ortalyǵyn jaryqtandyrýda qoldanylǵan qýat únemdeýshi shamdar aldaǵy ýaqytta da keńinen paıdalanylady.
Úshinshiden, «aqyldy tehnologııalar» - agroónerkásip keshenin qarqyndy damytý múmkindigi.
Aýyl sharýashylyǵynyń alǵa qadam basýy úshin agrarlyq ýnıversıtetterde oqý baǵdarlamasy jańartylady. Ǵylymmen aınalysatyn mamandar daıyndalady. Jańa tehnologııalar men bıznes-modelder engiziledi. Bul turǵyda Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń áleýeti zor. Elbasynyń tapsyrmasy boıynsha 5 jyl ishinde agroónerkásip keshenindegi eńbek ónimdiligi jáne óńdelgen aýyl sharýashylyǵy óniminiń eksporty kem degende 2,5 esege artýy qajet. Ótken jyly aýyl sharýashylyǵy ónimderin eksporttaý boıynsha birqatar jumystar atqaryldy. Iran eline tasymaldanǵan marqa etterin aıtýǵa bolady. Bıyl da osy qarqyn tómendemes úshin jańa tehnologııalar engiziledi.
«Indýstrııalandyrý kúni Elbasynyń aldynda ashylǵan jylyna 7 myń tonna qus etin óndiretin fabrıkanyń, sondaı-aq «Kýbleı» jáne «Jelaev» makaron óndirý kásiporyndarynyń eýropalyq memleketterden alynǵan qurylǵylar arqyly tehnıkalyq turǵyda jańǵyrtylǵanyn atap ótýge bolady. Osy saladaǵy ózge kásiporyndar da osylaı jańǵyrýdy qolǵa alýy tıis», degen Altaı Kólginov basqa salalarda atqarylýy tıis jumystardy da atap kórsetti.
Jıynǵa qatysýshylar Joldaýdy qoldaıtyndyqtaryn bildirip, tıisti qarar qabyldandy.
