Elbasy tapsyrmasymen jer qatynastary salasy tsıfrlandyrylyp jatyr- maman
Onyń aıtýynsha, Memleket basshysy bıylǵy Joldaýynda sybaılas jemqorlyqpen kúreste jer qatynastary men qurylys salasyndaǵy bıýrokrattyq rásimder jurtshylyqty mazalaıtyn máselelerdiń biri ekendigin atap ótken bolatyn.
Osyǵan oraı Elbasy jer qory men jyljymaıtyn múlik nysandary týraly málimetterdiń biryńǵaı aqparattyq bazasyn jasaýdy tapsyryp, atalǵan másele boıynsha tártip ornatyp, jerdi naqty paıdalanýshylarǵa jáne ınvestorlarǵa berý kerektigine toqtalǵan edi.
Joldaýda aıtylǵan mindetter men «Tsıfrlyq Qazaqstan» memlekettik baǵdarlamasyn júzege asyrý baǵytynda óńirde jer qatynastary salasyn tsıfrlandyrý boıynsha júıeli jumystar júrgizilýde.
Ótken jyldyń maýsymymnan bastap Oral qalasy ákimdiginde «Qoljetimdi ákimdik» atty memlekettik qyzmetterdi kórsetýge jáne qujattardy qabyldaý men óńdeýge arnalǵan ortalyq jumys isteýde. «SMART Oral» kóp fýnktsıonaldy qyzmet kórsetý ortalyǵy ashyldy, onda 640 qyzmet túri usynylady.
Sondaı-aq bıyldan bastap www.zem.kz elektrondyq portaly iske qosyldy. Bul portaldyń jumysy
jer qatynastary qurylymdarynyń qujat aınalymyn tsıfrlyq ońtaılandyrý jolymen qyzmet sapasyn arttyrýǵa baǵyttalǵan. Portalda múddeli tulǵalardyń 12 aýdan jáne Oral qalasy konkýrs jáne aýktsıon arqyly berilýi josparlanǵan jer ýchaskeleriniń shemalary, sondaı-aq jeke turǵyn úı qurylysyn júrgizýge jer ýchaskesin alý úshin kezekte turǵandar jáne yqylassyz jer paıdalanýshylar tizimin qaraý múmkindigi bar. Azamattar men zańdy tulǵalar saýda-sattyǵyna qoıylǵan aýyl
sharýashylyǵy jáne kommertsııalyq maqsattardaǵy bos jer ýchaskeleri týraly aqparatty qaraı alady. Portaldaǵy qoljetimdi aqparat turaqty túrde jańartylady.
Dııar Sultanǵalıevtiń sózine qaraǵanda, bıylǵy toǵyz aı boıynsha barlyǵy 15 myńnan astam jeke jáne zańdy tulǵalar elektrondyq portalǵa kirip, qajetti aqparattar aldy. Sonymen qatar 5 qazanda elektrondyq portalda Aqjaıyq aýdany boıynsha alǵash ret respýblıka tóńireginde aǵylshyn tásilimen kommertsııalyq maqsattaǵy jer ýchaskelerine jaldaý quqyǵyn elektrondyq aýktsıon arqyly satý ótkizildi. Aldaǵy ýaqytta atalǵan portal arqyly oblys boıynsha jer saýda-sattyǵyn ótkizý josparlanyp otyr.
«Bıylǵy jyldyń naýryz aıynda Oral qalasy ákimdigimen ýákiletti qurylymdarǵa jer ýchaskesin tańdaý aktisi boıynsha kelisý protsesin avtomattandyrýǵa múmkindik beretin www.easy.zko.org.kz portaly jasaqtalyp, iske qosyldy. Bul kelisý merzimderin 2-3 aıdan 5-10 kúnge deıin qysqartýǵa yqpal etti. Nátıjesinde, ótinish berýshiniń 20-dan asa kelisýshi uıymdarmen tikeleı baılanysy alyp tastalyp, jer qatynastary salasyndaǵy sybaılas jemqorlyq táýekelderi joıyldy», dedi D.Sultanǵalıev.
