Elbasy tapsyrmasymen BQO aýdandarynda 100 sport alańy salynbaq
Bórli aýdanynda bolǵan jumys sapary kezinde óńir basshysy Altaı Kólginovtiń málim etkenindeı, Memleket basshysy bıylǵy Joldaýdy jarııalaǵan kezde Úkimet pen ákimderge keminde 100 dene shynyqtyrý-sport keshenin turǵyzýdy tapsyrǵany belgili.
Osy oraıda, tek qalada ǵana emes, shalǵaı aýyldarda da turǵyndardyń, sonyń ishinde jastardyń dene shynyqtyrýmen dendep aınalysýy úshin sport alańdaryn salýdyń mańyzy zor. Sol sebepti «Nur Otan» partııasymen birlese otyryp, alys aýdandarda 100 sport alańyn salý josparlanyp otyr.
Óńirde irgeli eldi mekender de bar. Sonyń biri - Bórli aýdanyndaǵy Bórli aýyly. 4200 adam turatyn aýyldy kórkeıtýge ótken jyly 5 mlrd teńge jumsaldy. Elbasy tapsyrmasyna sáıkes qolǵa alynǵan «Nurly jol» baǵdarlamasy aıasynda aýyz sý qubyry tartylyp, mádenıet úıi kúrdeli jóndeýden ótkizildi, aýyldyń bas kóshesine qatqyl tabandy jol tóseldi. Endi jańa sport kesheni paıdalanýǵa berilip otyr. Munda aýyl turǵyndary trenajerde óz denesin shyńdaýmen birge boks, qazaq kúresi, voleıbol, shaǵyn fýtbol, basketbol, dopty hokkeı syndy sport túrlerimen aınalysa alady.
Jańa nysan «Qarashyǵanaq Petrolıým Opereıtıng b.v.» kompanııasynyń oblystyń áleýmettik jobalaryna bóletin qarjysy esebinen boı kóterdi. 320 oryndyq keshenniń jobalyq quny - 321 mln teńge. Munda 30 jańa jumys orny ashyldy.
«QPO b.v.» kompanııasy bas dırektorynyń orynbasary Marat Kárimovtiń sózine qaraǵanda, bıyldyń ózinde oblys boıynsha 35 mln AQSh dollaryna 36 joba júzege asyrylsa, sonyń beseýi Bórli aýdanynda iske qosyldy.
Aıta keteıik, Bórli aýdanynda sonymen qatar Keńtúbek jáne Jańaqonys aýyldaryna sapaly aýyz sý jetkizildi.
Elbasy Joldaýynda aıtylǵanyndaı, halyqqa sapaly áleýmettik qyzmet kórsetý, sonyń ishinde taza sýmen qamtý - mańyzdy baǵyttardyń biri. Sońǵy eki jylda oblystyń 110 aýylyna 2 myń km ortalyqtandyrylǵan sý qubyry tartyldy. Shalǵaıdaǵy Bókeı ordasy, Jańaqala aýdandarynyń ortalyqtary sapaly sý kózine qosyldy. Jánibek, Qaztalov aýdandarynda da osyndaı jumystar jalǵasýda. Eki jylda oblysta aýyldardyń taza sýmen qamtylý kórsetkishi 30 paıyzdan 45 paıyzǵa jetkizildi. Aldaǵy jyly taǵy 50 eldi mekenge aýyz sý qubyry tartylmaq.
Foto: Aleksandr Kýprıenko
