Elbasy tapsyrmasy: Ulttyq ekonomıka mınıstri eńbekaqynyń ósýine qatysty úndeý jasady

ASTANA. QazAqparat - QR Ulttyq ekonomıka mınıstri Tımýr Súleımenov Qazaqstan kásipkerlerin áleýmettik jaýapkerkeshilik tanytyp, eńbekaqy óskennen keıin taýar baǵasyn ósirmeýge shaqyrdy, dep habarlaıdy QazAqparat.

«Eldegi bıznesmenderge, iri jáne shaǵyn saýda jelilerine úndeý jasaǵym keledi, ıaǵnı eńbekaqy óskennen keıin, olar birden ónim baǵasyn ósirýmen jaryspaýy kerek», - dedi mınıstr Parlament Májilisiniń jalpy otyrysynan keıin tilshilerdiń saýalyna jaýap bere otyryp.

Osy oraıda T. Súleımenov ótken jyldarda halyqtyń naqty tabysy ekonomıka ósiminen qalys kelgenin túsindirdi.

«Jalpy alǵanda, ekonomıka ósti, alaıda jan basyna shaqqandaǵy kirister tejelip qaldy. Ekonomıka ósimine halyqtyń naqty tabysy laıyqty bolýy úshin biz bul kórsetkishterdi sáıkestendirip jatyrmyz. Bul turǵyda bıznestiń áleýmettik jaýapkershilik tanytqany óte mańyzdy. Osy protsess aıasynda olar ózderiniń taýarlarynyń qunyn negizsiz ósirimeýi qajet, sondaı-aq kórsetiletin qyzmetterge, tarıfterge baǵany negizsiz arttyrmaý kerek. Shyn máninde bul másele Úkimettiń baqylaýynda tur. Kún saıyn áleýmettik mańyzy bar taýarlar baǵasynyń ózgerýine qatysty vedomstvolardyń, oblys ákimderiniń esepteri tyńdalady», - dedi Tımýr Súleımenov.

Sóz sońynda mınıstr baǵanyń negizsiz ósýi oryn alǵan jaǵdaıda ókiletti organdar qatań sharalar qabyldaıtyndyǵyn eskertti.

Esterińizge sala keteıik, Elbasy Qazaqstan halyqana Joldaýynda eńbekaqyny kóterýge qatysty tapsyrma bergen bolatyn.