Elbasy tapsyrmasy: Túrkistanda 88 kásiporyn jumysshylarynyń jalaqysyn kóteredi

TÚRKІSTAN. QazAqparat - Túrkistan oblysynyń ákimi Janseıit Túımebaev Elbasy Joldaýyndaǵy jalaqyny kóterý týraly tapsyrmasyn oryndaý baǵytynda óńirde naqty is-sharalar atqarylyp jatqanyn aıtty, dep habarlaıdy QazAqparat tilshisi.

Aıta keteıik,  Memleket basshysy Nursultan Nazarbaev  «Qazaqstandyqtardyń ál-aýqatynyń ósýi: tabys pen sapasyn arttyrý» atty Qazaqstan halqyna Joldaýynda 2019 jyldyń 1 qańtarynan bastap eń tómengi jalaqyny kóterý týraly tapsyrma bergen bolatyn.

Osyǵan máselege oraı ótken  keńeste Baqytjan Saǵyntaev oblystar men Astana, Almaty jáne Shymkent qalasynyń ákimderine kásiporyndarda jalaqyny kóterý boıynsha túsindirme jumystar júrgizip, eńbek zańnamalaryn saqtaý jáne jumysshylardyń eńbekaqysyn kóterý jóninde naqty mindetter júktedi. 

Selektorlyq májiliste sóz sóılegen Janseıit Túımebaev búginde oblys aýmaǵyndaǵy  9798 kásiporynda  105811 jumysshynyń  13674-i (12,9%)  42500 teńgeden tómen jalaqy alatynyn jetkizdi. Bul derekter oblys ákimdigi júrgizgen arnaıy taldaý nátıjesinde anyqtalǵan.  Budan bólek, oblystaǵy memlekettik bıýdjettik mekemelerde 42 500 teńgeden tómen jalaqy alatyn    52 170 jumysshy bar ekeni belgili boldy.

«Osyǵan oraı, atalǵan kásiporyndar men mekemelerde Elbasynyń Joldaýyn iske asyrý maqsatynda úgit-nasıhat jumystary júrgizilip, nátıjesinde 88  kásiporyn 2019 jyldyń 1 qańtarynan bastap jalaqyny ósiretin boldy.  Aldaǵy ýaqytta bul baǵyttaǵy jumystar jalǵasyn tabady» - dedi Janseıit Túımebaev.

Aıta ketsek, Úkimettik selektorǵa oblys ákiminiń bastamasymen 20-ǵa jýyq iri jáne orta kásiporyndardyń basshylary qatysqan bolatyn. Solardyń biri - «Kentaý transformator zavody» aktsıonerlik qoǵamynyń bas dırektory Haırýlla Qojabaev kásiporyndaǵy ortasha jalaqyny 40 paıyzǵa kóterýge daıyn ekenin, ıaǵnı, ortasha jalaqy 75 myńnan 105 myń teńgege deıin ósetinin aıtty. Al, «Kas Beton» JShS-inde ortasha jalaqy edáýir kóteriledi. Ózge de kásiporyn basshylary Elbasy Joldaýyna qoldaý kórsetip, jumysshylardyń áleýmettik jaǵdaıyn jaqsartýǵa kúsh salatyndaryn jetkizdi.

Jalpy, óńirdegi júzge jýyq iri jáne orta kásiporyndar men mekemelerde túsindirý jumystary jáne kelissózder júrgizilip, olardyń basym bóliginiń basshylary jumysshylarynyń jalaqysyn kóterýge kelisim berdi.

Jumysshylardyń jalaqysyn kóterý jónindegi jumystar ózge kásiporyndarda da jalǵasyn tabady.