Elbasy tapsyrmasy: Túrkistan oblysynda 88 kásiporyn jalaqyny kóteredi
Bul týraly búgin Túrkistan oblysynyń ákimi Janseıit Túımebaev «Elbasy Joldaýy men «Rýhanı jańǵyrý» baǵdarlamasyn júzege asyrý jáne Túrkistan qalasyn damytý barysy» taqyrybynda Ortalyq kommýnıkatsııalar qyzmetiniń Túrkistan qalasynda ótkizgen kóshpeli baspasóz konferentsııasynda málimdedi.
Oblys ákimi QR Prezıdenti N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna arnaǵan Joldaýy boıynsha Túrkistan oblysynda atqarylyp jatqan sharalarǵa toqtaldy.
«Oblystaǵy kásiporyn basshylary eń tómengi jalaqyny kóterý máselesin qoldaıtynyn bildirip, iske kiristi. Búgingi tańda oblys aýmaǵynda 9798 kásiporyn bar. Eń tómengi jalaqyny kóterý boıynsha túsindirý jumystary júrgizilip, nátıjesinde ázirge 88 kásiporyn jalaqyny 2019 jyldyń 1 qańtarynan bastap kóterýge kelisti. Bul san áli kóbeıedi», - dedi ákim.
Aımaq basshysy baspasóz jıynynda Túrkistan oblysynyń bilim salasyna engizgen Jumys.Sitcen.kz júıesin Qazaqstan Respýblıkasynyń Prezıdenti Ákimshiligi respýblıkada eń úzdik júıe retinde tańdaǵanyn aıtyp, qazir ony basqa ónirlerge taratý máselesi qolǵa alynǵanyn jetkizdi. Bul júıeniń arqasynda bilim uıalaryndaǵy sybaılas jemqorlyq derekteri tómendemek.
Bıyl jańartylǵan bilim berý mazmunymen sabaq beretin 32,5 myń pedagogtyń aılyq jalaqysyna qosymsha 30% qosylǵan. Budan bólek, ol osy jyldyń qyrkúıek aıynan bastap jańa format boıynsha 4 200 pedagogtyń aılyq jalaqy sanattaryna qaraı 30-50 paıyz ústemeaqy tólenip jatqanyn da málimdedi (1 mlrd. 67 mln. teńge qaralǵan).
