Elbasy tapsyrmasy: SQO-da 40 myńnan astam adamnyń jalaqysy ósedi
Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda eń tómengi jalaqyny 1,5 ese arttyrýdy tapsyrǵan bolatyn. Soltústik Qazaqstan oblysyndaǵy kóptegen kásiporyndar óz qyzmetkerleriniń jalaqysyn arttyrýdy bastap ketti. Atap aıtqanda, óńirdegi eń iri agroónerkásip kásiporyndarynyń biri «Mámbetov jáne K» kommandıttik seriktestigi 60 qyzmetkeriniń jalaqysyn 35 myń teńgeden 42 myńǵa kóterdi.
Qazan aıynan bastap taǵy birqatar agroqurylymdar jalaqyny ósirdi. Máselen, «Taıynsha Astyqta» eńbek etip otyrǵan 100 jumysshynyń eńbekaqysy artty, endi olar burynǵy 50 myń teńgeniń ornyna aı saıyn 60 myń teńgeden alady. «Shaǵala-Agro» JShS de 1 qazannan bastap jalaqyny kóterdi.
Іri ónerkásip kásiporyndarynyń biri «Kırov atyndaǵy zaýyt»AQ jáne «Munaımash» AQ keler jyldan bastap jalaqyny jappaı kóterýge ýáde etip otyr. Budan bólek, «Servıs-Jarys» JShS, «Soltústik Qazaqstan aýylsharýashylyq tájirıbelik stantsııasy» JShS, «Zagot Inter» jáne «Adel qus» JShS sııaqty kásiporyndarda da eń tómengi jalaqy ósedi.
Jalpy, jańa jyldan bastap óńirdiń 43 myń turǵynynyń ál-aýqaty jaqsarady.
