Elbasy tapsyrmasy: SQO-da 144,6 myń turǵynnyń eńbekaqysy ósedi
PETROPAVL. QazAqparat - Elbasy N.Nazarbaevtyń tapsyrmasyna oraı Soltústik Qazaqstan oblysynda kásiporyndar jańa jyldan bastap jumysshylarynyń eńbekaqylaryn ósiredi. Óńirdiń naqty ekonomıka sektorynda júrgen 101,6 myń adamnyń jaǵdaıy jaqsarady, dep habarlaıdy QazAqparat.
Petropavldaǵy «Izolıt» JShS joǵary sapaly elektroqshaýlaǵysh materıaldar shyǵarady. Zaýyttyń ónimi Qazaqstanda ǵana emes, kórshi Reseı men Ýkraına, Belarýs elderinde de suranysqa ıe. Bolashaqta Armenııamen jumys istemek.
Kásiporynnyń bas dırektory Aleksandr Bebeshkonyń aıtýynsha, 2018 jyldy olar tabyspen aıaqtaǵaly otyr, barlyq tehnıkalyq-ekonomıkalyq kórsetkishter boıynsha oń nátıje bar.
«Ónerkásiptik óndiris kólemin 107,5 paıyzǵa, jumysshylardyń sanyn 6,6 paıyzǵa arttyrdyq. Qazir zaýytta 97 adam eńbek etedi. Ortasha eńbekaqy - 99 myń teńge. Jańa jyldan bastap 10 paıyzǵa arttyrýdy josparlap otyrmyz. Bıyl jalaqyny 13 paıyzǵa kóbeıtkenbiz. Árıne ekonomıka zańyna sáıkes eńbekaqynyń kóterilýi eńbek ónimdiliginen aspaýy qajet. Sondyqtan, eńbek ónimdiligin barynsha arttyrýdamyz», - deıdi elektroqshaýlaǵysh materıaldar zaýytynyń dırektory.
Brıgadır Vera Stepınanyń «Izolıt» JShS-da eńbek etip jatqanyna bıyl 40 jyl. Mektepti bitirip kelgen boıjetken kásiporynda ysylyp, tájirıbe jınap, bilikti mamanǵa aınaldy.
«Bul kásiporynda maǵan barlyǵy unaıdy. Daıyn ónimderdi shyǵaramyz. Elektroqshaýlaǵysh materıal - lakty matanyń tutqyrlyǵyn, ıilgishtigin, salmaǵyn árdaıym baqylap otyrý qajet. Ónimimiz ǵarysh salasyna da, ushaqtar men poıyzdarǵa da, mashınalarǵa da kerek. Sondyqtan bolar, jumys ornymmen maqtanamyn. Jalaqymyzdy ýaqytyly alamyz», -deıdi Vera Stepına.
Elektroqshaýlaǵysh materıaldar shyǵaratyn kásiporyn 1941 jyly jeltoqsan aıynda Petropavlǵa Máskeý men Máskeý oblystarynan kóshirilgen zaýyttardyń negizinde M.I.Kalının atyndaǵy zaýyt bolyp qurylǵan bolatyn. Ol - Keńes Odaǵyndaǵy elektroqshaýlaǵysh materıaldar shyǵaratyn eń iri kásiporyndardyń biri boldy. Al, toqyraý jyldary zaýyt negizinde «Izolıt» JShS quryldy.
