Elbasy tapsyrmasy: Shymkentte memlekettik-jekemenshik áriptestik aıasynda sport keshenderi ashylýda
ShYMKENT. QazAqparat - Shymkentte sportpen shuǵyldanatyn turǵyndardyń úlesi 30 paıyzǵa jýyqtaǵan. Shaharda jastardy buqaralyq sportqa baýlıtyn jańa nysan kóptep ashylýda, dep habarlaıdy QazAqparat tilshisi.
Elbasy bıylǵy Joldaýynda óńirlik deńgeıdegi rezervterdi taýyp, buqaralyq sport pen dene shynyqtyrýdyń qoljetimdiligin arttyrý qajettigin atap ótkeni belgili. Bul baǵytta Úkimet pen ákimderge kem degende 100 dene shynyqtyrý-saýyqtyrý keshenin salýdy tapsyrǵan bolatyn. Osy tapsyrmaǵa sáıkes shym shaharda áleýmettik-jekemenshik áriptestik aıasynda jańadan sport kesheni boı kóterdi.
Abaı aýdanyndaǵy Jıdeli shaǵynaýdanynan salynǵan nysanda 5 jastan 18 jasqa deıingi jastardyń jyl on eki aı dop tebýine múmkindik bar.
5000-ǵa jýyq turǵyny bar móltekaýdanda endi jasóspirimderdiń sabaqtan tys ýaqytynda bir sát tájirıbeli mamannan fýtbol álippesin úırenip, óz-ózderin damytýǵa barlyq jaǵdaı jasaldy. «Shalqar Bastaý» JShS fýtbol kesheniniń qurylysyn úsh aıdyń ishin-aq aıaqtaǵan. Qurylysqa jalpy 84 566 400 teńge jumsalǵan. Seriktestik quryltaıshysy Bek Aıdosov nysandy salýdaǵy basty maqsaty shaǵynaýdannyń jastary men jasópirimderiniń bos ýaqytyn tıimdi paıdalanyp, salaýatty ómir saltyna baýlý ekenin aıtady.
«Negizinen qurylys jumystaryn erte aıaqtaǵanbyz. Qujattaryn retteýge birshama ýaqyt ketti. Negizgi maqsatymyz - jastardy sportqa tartyp, olardyń ishinen áıgili sportshylardy baptap shyǵarý. Josparymyzdy júzege asyrýda memleketten de kóptegen járdem berildi», - deıdi kásipker.
240 balaǵa arnalǵan keshende barlyq jaǵdaı jasalǵan. Kıim aýystyrý, jýynatyn bólmeleri, tynyǵatyn oryndar qarastyrylǵan. Munda 4 bapker balalardy fýtboldyń qyr-syryna úıretedi. Aıta keteıik, memlekettik-jekemenshik áriptestik baǵdarlamasy qazir kásipkerlerge qol bolyp tur. 15 jylǵa jasalǵan kelisim-shart boıynsha endi eki tarap qaladaǵy buqaralyq sportty damytý jumysyn birlese atqarady.
Bul rette memlekettik-jekemenshik áriptestik aıasynda Qazyǵurt shaǵynaýdanynda da taǵy bir sport kesheni paıdalanýǵa berildi. Osylaısha qaladaǵy buqaralyq sportpen shuǵyldanýshylar sanyn arttyrý maqsatyndaǵy jobalar jalǵasyn tappaq.
Eske salar bolsaq, búginde qalada jalpy 804 sport nysany bar. Onyń ishinde: stadıon - 3, sport saraıy - 1, sporttyq qurylǵylar kesheni - 6, sporttyq keshender - 11, sporttyq manej, atý alańy - 5, jazyqtyqty qurylǵylar - 433, tennıs korttary - 33, júzý basseınderi - 8, sport zaldar- 229 jáne ornatylǵan sport zaldar - 65. Aldaǵy ýaqytta 427 gektardy quraıtyn «Shymkent city» shaǵynaýdanynda «Shymkent arena» sport kesheni salynady dep josparlanyp otyr.
Elbasynyń halyqtyń 30 paıyzyn buqaralyq sportqa jumyldyrý tapsyrmasyna osylaısha kásipkerlerdiń de qoldaý kórsetetin sáti týyp otyr. Eńseli ǵımarattar salýǵa, týǵan qalasyna buqaralyq sportpen shuǵyldanýǵa jaǵdaı jasaýǵa isker azamattar da jumyla kirispek.
