Elbasy tapsyrmasy: Shymkentte 190 myń jumysshynyń jalaqysy ósedi

ShYMKENT. QazAqparat -  Shymkentte 190 myń jumysshynyń jalaqysy ósedi. Memleket basshysynyń tapsyrmasyna sáıkes jalaqyny kóterý kezeń-kezeńimen júzege asady. Bul týraly qala  basshysy Ǵabıdolla Ábdirahymovtyń jergilikti kásipkerlerimen kezdesýinde aıtyldy, dep habarlaıdy QazAqparat tilshisi.

Jıynǵa qatysqan 70-ten astam kásipker óz qyzmetkerleriniń, ásirese jalaqysy tómen jumysshylardyń eńbekaqysyn kóterýge daıyn ekendikterin jetkizdi. Jalpy, jalaqyny kóterý kezeń-kezeńimen júrgiziletin boldy. Máselen, bir kásiporyn qarasha aıynan bastap jalaqyny ósirse, keıingisi  jeltoqsan aıynda kóbeıtedi.  Al, úshinshileri keler jyldyń qańtarynan bastaımyz dep josparlap otyr.

Aıta keteıik, qazan aıynda Memleket basshysy Qazaqstan halqyna arnaǵan jyl saıynǵy Joldaýynda Úkimetke qazaqstandyqtardyń eń tómengi jalaqysyn bir jarym ese, ıaǵnı 28 myńnan 42 myń teńgege deıin kóterýdi tapsyrǵan bolatyn.

Búginde shymshaharda qala turǵyndarynyń 30%-dan astamynda turaqty jumys bar. Onyń 56 myńy eń tómengi jalaqyny alady. 11 myńǵa jýyǵy - bıýdjet salasynyń qyzmetkeri. Sondyqtan aldymen sol qyzmetkerlerdiń jalaqysy ósirý josparda bar.

Basqosýda sondaı-aq azyq-túlik pen eń qajetti degen taýarlar baǵasynyń ósýi de talqylandy. Qaladaǵy iri bazar basshylary óz kezeginde baǵany ustap turý úshin qajetti sharalar qoldanýǵa ýáde berdi. Sonymen qatar, Shymkent qalasy ákimdigi janynan bazarlar men kásiporyndardyń jáne iri saýda ortalyqtarynyń basshylarymen birge baǵanyń ósýine jol bermeý máselesi boıynsha jumys isteıtin arnaıy shtab qurylǵany aıtyldy.