Elbasy tapsyrmasy: Óńirlerdegi áleýmettik máselelerdiń kartasy ázirlendi
Jıyn barysynda Á.Isekeshev Memleket basshysynyń tapsyrmalarynyń tolyq ári sapaly oryndalýy úshin baqylaýdy kúsheıtýdiń mańyzdylyǵyn aıtty.
Prezıdent Ákimshiliginiń Basshysy Áset Isekeshev Prezıdenttiń Qazaqstan halqyna Joldaýynda aıtqan mindetterin, memlekettik baǵdarlamalardy, «100 naqty qadam» Ult josparyn odan ári júzege asyrý maqsatymen naqty nátıjege qol jetkizýge baǵyttalǵan baqylaý jáne monıtorıng júrgizý júıesiniń engiziletinin málimdedi. Bul rette, Á.Isekeshev memlekettik organdardyń qyzmeti, Qazaqstan Prezıdenti birneshe ret atap kórsetkendeı, halyqtyń ál-aýqaty men tabysyn arttyryp, turmys sapasyn jaqsartýǵa baǵyttalýy tıis.
«Turaqty júrgizilgen áleýmettik zertteýler men taldaýlar negizinde Óńirlerdegi ózekti ınfraqurylymdyq jáne áleýmettik máselelerdiń kartasy ázirlendi. Bul qujat ári qaraı jumys isteý úshin Úkimet pen ákimderge joldandy», - dedi Prezıdent Ákimshiliginiń basshysy.
Basqosýda memlekettik organdardyń ashyqtyǵy jáne halyqpen tyǵyz qarym-qatynasy onyń tıimdi qyzmetiniń mańyzdy sharty sanalatyny atap ótildi. Osyǵan oraı, óńirlerde ákimderdiń jyl saıynǵy esep berý kezdesýleriniń ornyna barlyq aýdandaǵy turǵyndarmen turaqty kezdesý ótkizýdi, sonyń ishinde azamattardy jeke qabyldaýdy uıymdastyrýdy kózdeıtin jańa jumys formaty qabyldandy. Sondaı-aq, barlyq aýdandyq jáne qalalyq ákimdikterde halyqpen tikeleı qarym-qatynas jasaý jáne keri baılanys ornatý júıesi engiziledi.
Bul azamattardyń mańyzdy máselelerin jedel sheship, óńirlerden shynaıy aqparat alýǵa múmkindik beredi. Osy jumystar Elbasy usynǵan «Halyqqa kómek» jobasy aıasynda «Nur Otan» partııasymen birlesip júrgiziletin bolady.
Á.Isekeshev Prezıdent Ákimshiligi budan bylaı áleýmettik saıasatty tıimdi júrgizýge, zań ústemdigi men azamattardyń qaýipsizdigin qamtamasyz etýge, memlekettik qyzmetter sapasyn arttyrýǵa, sybaılas jemqorlyqpen kúresýge, óńirlik ınfraqurylym sapasyn jaqsartýǵa, sonyń ishinde «Qutty meken» jáne «Aýyl - el besigi» jobalarynyń iske asyrylýyna, sondaı-aq «Rýhanı jańǵyrý» baǵdarlamasy aıasynda belsendi júzege asyrylatyn jobalarǵa basa nazar aýdarylatynyn aıtty.
Sońynda Á.Isekeshev jergilikti jáne ortalyq memlekettik organdar basshylarynyń jumysyn baǵalaý prıntsıpi ózgeretinin atap ótti. Osyǵan baılanysty reformalar men memlekettik baǵdarlamalardy júzege asyrýdyń tıimdiligine monıtorıng jáne baqylaý júrgizýdiń jańa júıesi engiziletin bolady. Bul máselelermen Prezıdenttiń tapsyrmasyna sáıkes, «Nur Otan» partııasymen birlesip qurylatyn Tıimdilikti baǵalaý jáne monıtorıng ortalyǵy aınalysady.
Jıyn qorytyndysy boıynsha, Prezıdent Ákimshiliginiń tıisti barlyq qurylymdyq bólimshelerine júktelgen mindetterdiń sapaly ári ýaqtyly oryndalýyn qamtamasyz etý tapsyryldy.
