Elbasy tapsyrmasy: Qostanaıda elektr energııasy quny 2,4 paıyzǵa arzandaıdy
Elbasy tapsyrmasyna sáıkes, Qostanaı oblysynda tarıf saıasatyna qatysty birqatar jumystar atqaryldy. Sala mamandary turǵyndarmen kezdesýde jumys nátıjelerin aıtyp, aldaǵy josparlarymen bólisti.
«2019 jyldyń 1 qańtarynan bastap elektr qýatynyń quny azaıyp, aǵymdaǵy jyldyń aqpanynan taǵy 2,4 paıyzǵa arzandaıtyn bolady. Jyl basyndaǵy kórsetkishke súıensek, oblysta 200 myńnan astam turǵyn elektr energııasyn tutynady, al zańdy tulǵalardyń sany - 9 000. Elektr qurylǵylarymen jabdyqtaý qyzmetiniń áleýmettik mańyzy joǵary jáne ol memlekettiń qadaǵalaýynda. Elektr energııasynyń tarıfteri ýákiletti organmen kelisilgennen keıin naqtylanady. Oblys boıynsha baǵa tekserildi, sonyń nátıjesinde tarıf tómendetildi», - dedi Qostanaı energetıkalyq ortalyǵynyń dırektory Anargúl Óskenbaeva.
Jyl basynan beri elektr energııasyniń tarıfi qaıta eseptelip, turǵyndarǵa 30 mln teńge qaıtaryldy.
2019 jyly jalpy túsim nátıjesinde kommýnaldyq tólemderge qatysty tutynýshylar úshin qarjylyq júkteme 712 mln teńgege azaıady.
Aıta ketetin bir másele, zamanaýı talaptarǵa saı kelmeıtin elektr jelileri jumysty jedeldetýge kedergi. Energotranzıt aımaqaralyq seriktestiginiń bas dırektory Vladımır Kannyń sózinshe, tozyǵy jetken nysandar jeterlik.
«Olardyń deni ótken ǵasyrdyń 60-70 jyldary salynǵan. Negizi elektr jelileriniń jumys isteý merzimi 50 jyl bolsa, qosalqy elektr stansalaryn 25 jyl qoldanýǵa bolady. Nátıjesinde, tozǵan elektr symdary kóptegen shyǵynǵa batyrady. Tıisinshe aıyppuldy da kóbirek tóleýge májbúrmiz», - deıdi seriktestik basshysy.
Eske salsaq, Nursultan Nazarbaev bıylǵy Joldaýda turǵyn úı-kommýnaldyq sharýashylyǵy jáne tabıǵı monopolııa qyzmetteriniń tarıfterin retke keltirý jóninde arnaıy tapsyrma bergen bolatyn.
