Elbasy tapsyrmasy: Qostanaıda densaýlyq saqtaýdyń jol kartasy jasaldy
QOSTANAI. QazAqparat - Qostanaı emhanalarynda tsıfrlandyrý baǵdarlamasy aıasynda jumys júıesin qaǵazsyz aınalymǵa kóshirý júrgizilip jatyr. Bul týraly óńirlik kommýnıkatsııalar qyzmetinde ótken brıfıngte oblystyq densaýlyq saqtaý basqarmasy basshysynyń orynbasary Abat Jaýkov málimdedi, dep habarlaıdy QazAqparat.
Oblystyq densaýlyq saqtaý basqarmasy emhanalarda keshendi medıtsınalyq aqparattyq júıe engizdi. Nátıjesinde, qaǵazbastylyqtan arylyp, emhanalardaǵy kezek azaıyp, ýchaskelik dárigerlerge júginý qajettigi tómendedi. Búginde Qostanaı oblysynyń densaýlyq saqtaý basqarmasy tıisti mınıstrlikpen birigip, densaýlyq saqtaýdyń jol kartasyn jasady. Ázirge munda 37 is-shara belgilengen.
«Búginde tsıfrlandyrý aıasynda qaǵazsyz aınalymǵa kóshý júrgizilip jatyr. Keler jyldan bastap elektrondyq ambýlatorııalyq kartalar, aýrýlardyń elektrondyq tarıhy jáne elektrondyq retseptilerdiń kóshirmesi sııaqty qujattardy qaǵazsyz formatta júrgizýge tolyqtaı aýystyrlady. Oblystaǵy 51 memlekettik medıtsınalyq mekemeniń 48-i elektrondy júıege qosylǵan. Jyl sońyna deıin jańa júıege Qostanaı, Rýdnyı, Arqalyq qalalaryndaǵy psıhıkalyq dıspanserdi kóshiremiz. Jalpy 7696 dáriger aqparattyq baǵdarlamalardy meńgerý úshin arnaıy oqý dáristerine qatysty. Emhanalarda 35 medıtsınalyq qujat qoldanystan shyǵaryldy. Kelesi jyldyń basynda 84 qujat formasy elektrondy nusqaǵa almastyrylmaq», - dedi Abat Jaýkov.
2018 jyldyń naýryz aıynda óńirde elektrondy densaýlyq pasporty engizildi. Qazirgi ýaqytta 639238 adamnyń elektrondy pasporty bar. Abat Jaýkov aıtqandaı, turǵyndar mobıldik qosymsha arqyly dárigerdi úıine shaqyrtyp nemese qabyldaýyna jazyla alady.
Ár medıtsınalyq mekemeniń málimetter bazasynda elektrondy densaýlyq saqtaý pasporty, patsıenttiń jáne dárigerdiń jeke kabınetteri bolady. Damumed aqparattyq júıesi tutynýshylarǵa óz densaýlyǵynyń jaı-kúıi, densaýlyq saqtaý qyzmetteri týraly qajetti aqparattardy alýǵa múmkindik beredi. Óz kezeginde turǵyndar jeke kabınetine kirip, medıtsınalyq uıymnyń kórsetken qyzmetine baǵa beredi.
Sondaı-aq, kelesi jyldan bastap qostanaılyq ýchaskelik dárigerlerdiń jalaqysy ósetini belgili boldy. Ózderińizge belgili, Memleket basshysy Nursultan Nazarbaev bıylǵy Joldaýynda medıtsına qyzmetkerleriniń jalaqysyn kóterýdi tapsyrdy.
Aıta keteıik, 5 qazan kúni QR Prezıdenti Nursultan Nazarbaev Qazaqstan halqyna kezekti Joldaýyn jarııalaǵan bolatyn.
