Elbasy tapsyrmasy: Kentaýda kommýnaldyq qyzmettiń quny tómendedi
ASTANA. QazAqparat -Túrkistan oblysynyń ákimi Janseıit Túımebaev Kentaý qalasyna arnaıy jumys saparymen bardy. Sapary barysynda ondaǵy birqatar nysandardy aralap, atqarylyp jatqan jumystarmen tanysty. Bul týraly QazAqparat ákimdiktiń baspasóz qyzmetine silteme jasap habarlaıdy.
Aldymen aımaq basshysy Oranǵaı aýyldyq okrýgindegi «Ál-Bereke» aýyl sharýashylyǵy óndiristik kooperatıvine aıaldady. 2016 jyly qurylǵan nysan kókónis jáne jemis-jıdekterdi qaıta óńdeý, saqtaý jáne daıyn ónimdi ótkizý sharýalaryn atqarýǵa baǵyttalǵan.
Kooperatıvtiń jalpy jer kólemi - 300 gektardy quraıdy. Onda 50 ga alma baýy, 30 ga júzim, 40 ga alhory, 40 ga abrıkos, 140 ga baqsha, kókónis daqyldary egilgen. 30 adam turaqty jumyspen qamtylǵan.
Mekeme jylyna 450 myń lıtr jemis-jıdek shyrynyn, 1500 tonna kókónis marınadyn, 1200 tonna tomat, alma, asqabaq ezbelerin daıyndaýǵa qaýqarly. Kooperatıvine 2018 jyldyń 11 aıynda jalpy sommasy 292 mln. teńgeni quraıtyn 1950 tonna taýar óndirgen. Onyń 1200 tonnasy ishki naryqqa ótkizilse, 750 tonnasy Reseı Federatsııasyna eksporttalǵan.
Qazirgi tańda atalǵan mekeme aýyl sharýashylyq daqyldaryn alý jóninde jalpy jer kólemi 350 gektar quraıtyn 7 aýyl sharýashylyq taýar óndirýshilerimen kelisim shart jasasqan.
Sonymen birge, aımaq basshysy «Kentaý servıs» memlekettik kommýnaldyq kásipornyn aralap kórdi. Qalany jylýmen qamtamasyz etetin mekeme 2011 jyly qurylǵan. Seriktestikte 395 adam jumys isteıdi. Atalǵan mekeme 334 kópqabatty turǵyn úıge, 2121 jeke úıge, 374 kommertsııalyq nysanǵa jáne 102 bıýdjettik mekemege jylý berip keledi. Jalpy qalada 38,2 shaqyrym magıstraldyq, 116,8 shaqyrym ishki oramdyq jylý qubyry tartylǵan.
Mekeme basshysy Tóleý Áshirhan Elbasynyń tapsyrmasyna sáıkes, kommýnaldyq qyzmettiń quny 136-dan 103,88 teńgege nemese 23,88 paıyzǵa arzandatylǵanyn jetkizdi.
Sondaı-aq, tómen jalaqy alatyn 60-tan astam azamattyń eńbekaqysyn kóterý maqsatynda mekeme bıýdjetinen 1 mln. 600 myń teńge qaralyp otyrǵanyn aıtty.
Atqarylyp jatqan sharýalarǵa qanyqqan oblys ákimi halyqqa sapaly qyzmet kórsetý baǵytynda tıisti sharalardy der kezinde atqarýdy tapsyrdy.
