Elbasy tapsyrmasy boıynsha Qaraǵandy men Temirtaýda áleýmettik nysandar salynady
QARAǴANDY. QazAqparat - Qaraǵandy oblysynyń bılik ókilderi Prezıdenttiń 2018 jyly qyrkúıekte aımaqqa jasaǵan jumys sapary barysynda bergen tapsyrmalaryn oryndaý boıynsha jumystardy iske asyryp jatyr, dep habarlaıdy óńir basshysynyń resmı saıty.
Jaqyn bolashaqta Qaraǵandy jáne Temirtaýda jańa áleýmettik nysandar paıda bolady. Ol jaıly oblys ákimi Erlan Qoshanov Ortalyq kommýnıkatsııalar ortalyǵynda ótken brıfıngte málimdedi.
- Qyrkúıekte biz Elbasyna Qaraǵandynyń Jańa ortalyǵyn damytý boıynsha josparlarymyzdy tanystyrdyq. Prezıdent atalmysh bastamany qoldady. Buǵan qosa oblys ortalyǵyn mıllıon turǵyny bar qalaǵa aınaldyrý kerektigi týraly oıyn bildirdi. Biz shahardy damytý strategııasyn qurýǵa kirisip kettik, - dedi Erlan Qoshanov. 
Elbasy bergen tapsyrmalardy júzege asyrý erekshe baqylaýda.
- Qys aılarynda Qaraǵandyda qazirgi zamanǵy balalar jáne jasóspirimder saraıynyń qurylysyn bastaımyz. Dástúrli úıirmelermen qatar munda jańa sektsııalar da qarastyrylady: robototehnıka jáne modeldeý boıynsha, sondaı-aq planetarıı úıirmesi. Kóktemde olımpıada standarttaryna saı keletin 50 metrlik júzý basseıni salyna bastaıdy. Qaraǵandyda daryndy júzgishter, sınhronshylar jeterlik, biz olarǵa barlyq jaǵdaı jasaımyz»,- dep atap ótti oblys ákimi.
Oblys ortalyǵynda sondaı-aq 1500 orynǵa shaqtalǵan kontsert zaly, Kúres ortalyǵy salynady.
- Qaraǵandynyń temirjol vokzaly tolyqtaı qalpyna keltiriledi. Jolaýshylar aǵymy 2,5 ese artady. Eń bastysy - biz ǵımarattyń biregeı tarıhı qasbetin, japsyrmalaryn, barelefterin saqtap qalamyz. Buǵan qosa, jerlesimiz Gennadıı Golovkın aýdany 5500 sharshy metrdi quraıtyn sport keshenin salyp jatyr,- dep qosty Erlan Qoshanov.
Metallýrgter qalasynda, Elbasynyń tapsyrmasyna saı, «ArselorMıttal Temirtaý» kompanııasy 20 myń jańa emhana, erte damytýǵa arnalǵan balabaqsha jáne kásibı sport keshenin salady.
- Atalmysh nysandar turǵyndardyń osy saladaǵy qajettilikterin tolyqtaı qanaǵattandyratyn bolady. Buǵan qosa, «ArselorMıttal Temirtaýǵa» JEO-2 jańǵyrtý tapsyryldy. Búgingi tańda kompanııa shamamen 20 mlrd teńge somasyna jańa qazandyq salý boıynsha jumystardy bastaǵan. Ol temirtaýlyqtardyń jaǵdaıyn jaqsartyp, kóp jyldar boıy ózekti bolyp kelgen jylýmen qamtý máselesin sheshedi,- dep atap ótti óńir basshysy.
