Elbasy tapsyrmasy: Bıyl aýyl joldaryn jaqsartýǵa 147 mlrd teńge bólindi
ALMATY. QazAqparat - Qazaqstan jol ǵylymı-zertteý ınstıtýtynyń ókilderi Qazaqstannyń nelikten álemde eń nashar joldary bar elder reıtınginde ekenin túsindirdi, dep habarlaıdy «QazAqparat» HAA tilshisi.
«Bizdiń pikirimizshe, osynshama tómen kórsetkishterge jergilikti mańyzy bar joldardyń jaǵdaıy áser etti. Men táýelsizdik alǵannan keıin salynǵan joldarymyz jaqsy dep sanaımyn. Kóptegen elderde boldym, olardyń joldarynyń sapasyn baǵaladym. Qazirgi kezde bizdiń kólik joldarymyzdyń qurylys qarqyny óte joǵary dep aıta alamyn. Al bul joldardyń paıdalanylýy - bul basqa másele. Memleket basshysy aldaǵy ýaqytta joldardyń sapasyn jaqsartý isin qolǵa alýdy tapsyrdy, bizde 73 myń shaqyrymǵa jýyq jol bar», - dedi «QazjolǴZI» AQ-nyń prezıdenti Baǵdat Teltaev.
Elbasynyń jol salý uıymdarynyń aldyna qoıǵan birinshi kezektegi mindet - shalǵaıdaǵy óńirler men aýyldarǵa jol salý.
«Memleket basshysy aıtqandaı, biz aýyldarǵa kóńil aýdarýymyz kerek. Bıylǵy jyly aýyldyq avtomobıl joldarynyń sapasyn jaqsartýǵa 147 mlrd teńge bólingen. Kelesi jyly taǵy 140 mlrd teńge bólinedi. Bizde aýyldarda jol joq degen pikir nege qalyptasqan? Sebebi avtomobıldiń kóbeıýi joldardy salý qarqynynan qashan da kóp. Jańa eldi mekenderde aldymen úıler salynyp, odan keıin ǵana jol qurylysy bastalady. Sondyqtan aýyl shetinde qashanda durys jol bolmaıdy. Biz bul problemany sheshetin bolamyz», - dep sendirdi B.Teltaev.
Sondaı-aq ol Qazaqstanda jergilikti mańyzy bar avtomobıl joldarynyń 40 paıyzynyń jaǵdaıy jaqsy, 30 paıyzy - qanaǵattanarlyq jáne taǵy 30 paıyzy nashar ekenin atap ótti.
Atap ótý kerek, Jahandyq básekege qabilettilik ındeksiniń nusqasy boıynsha, 2017-2018 jyldary eń úzdik jáne eń nashar joldary bar elder reıtınginde Qazaqstan 137 eldiń ishinen 115-shi oryn alǵan.
