Elbasy tapsyrmasy: Balabaqsha tárbıeshisine qosymsha aqy tólenedi

ASTANA. QazAqparat - Balabaqshada jańartylǵan mazmunmen jumys isteıtin tárbıeshige qosymsha aqy tólenedi. Bul týraly búgin QR Parlamenti Senatynyń depýtattarymen kezdesken Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.

Onyń aıtýynsha,  mınıstrlik mektepke deıingi bilimniń sapasyn kóterý boıynsha jol kartasyn daıyndaǵan. Onda birneshe usynys bar jáne qazirgi ýaqytta olar talqylaný ústinde.

«Birinshiden - biryńǵaı biliktilik, muǵalimderge sııaqty ulttyq testileýdi engizý.  Bıyl 60 myń muǵalim bizge kelip, ulttyq testileýden ótti. 36 muǵalim joǵary baǵa alyp, jańa biliktilikke ıe boldy. Sonymen aılyqtary 30-50 paıyzǵa deıin kóterilip otyr. Endi sonyń bárin tárbıeshilerge usynyp otyrmyz», -dedi ol.

Nátıjesinde mınıstrdiń sózine qaraǵanda, biryńǵaı biliktiligin arttyryp, ulttyq testileýden ótken tárbıeshilerdiń aılyqtary 30-50 paıyzǵa artatyn bolady.

«Ekinshiden,  mınıstrlik barlyq tárbıeshilerdi V3 bloktan V2 blokqa kóterý usynystaryn jáne esebin daıyndap otyr. Kelesi jyly ony memlekettik bıýdjettik komıssııaǵa shyǵaratyn bolamyz. Úshinshiden, mektepterdegi sııaqty jańartylǵan mazmunmen jumys isteıtin pedagogtarǵa qosymsha aqy tóleý qarastyrylady», - dedi Erlan Saǵadıev.

Eske salsaq, Memleket basshysynyń bıylǵy Joldaýy mektepke deıingi bilim berý júıesi aldyna eleýli mindetter qoıdy.