Elbasy tapsyrmasy: Astana ákimi jas kásipkermen almabaq máselesin talqylamaq

ASTANA. QazAqparat - Búgin Astana ákimi Baqyt Sultanov pen atyraýlyq jas kásipker, baǵban Tamıla Rozmetova elordada alma ósirý jaıyn talqylaıdy. Bul týraly búgin «Nazarbaev Ýnıversıtetinde» ótip jatqan Self-made forýmy aıasynda atyraýlyq baǵban Tamıla Rozmetova aıtty, dep habarlaıdy QazAqparat tilshisi.

«Eshki fermasyn 2013 jyly memlekettiń qoldaýymen ashqan edik. Sharýashylyqty ashýǵa qajetti qarajattyń jartysyn memleket nesıe retinde bólse, jartysyn óz qaltamyzdan shyǵardyq. Al alma baǵyn 2005 jyldan beri ósirip kelemiz. Atyraýda 150 gektar alqapta almanyń sýyqqa, jelge shydamdy 32 surpyn ósiremiz. Bul suryptardy agrarıılerimiz tálimbaqta Astana úshin de arnaıy beıimdep otyr. Alma aǵashtarynyń Astanaǵa da jersinip, 2-3 jyldyń ishinde jemis beretindigine senimimiz mol»,- dedi Rozmetova.

Sonymen qatar ol Jastar jylynyń ashylý saltanaty aıaqtala salysymen Astana ákimi habarlasqanyn aıtty.

«Forýmnan shyqqanymyzǵa jarty saǵat bolmastan Astana ákimi habarlasty. Ol bizdi búgin kezdesýge shaqyrdy. Onda alma aǵashy qaıda, qaı aýmaqta egiletindigin, qansha jer kerektigin talqylaımyz. Injener-agronomdarymyzdyń alma aǵashyn egý josparyna saı syzba daıyndap qoıdym. Alma baǵynyń balabaqsha ne mekteptiń nemese qandaı da bir jastar qozǵalysynyń álde ákimdiktiń qaramaǵynda bolatyndyǵyn búgin sheshemiz. Jalpy bul baq Astanaǵa syılyǵymyz bolmaq. Alma aǵashyn egýdi kóktemde bastamaq oıymyz da bar», - dedi Tamıla Rozmetova.

Esterińizge sala ketsek, Jastar jylynyń ashylý saltanatynda atyraýlyq 27 jastaǵy kásipker Tamıla Rozmetova Elbasy Nursultan Nazarbaevtan Astanada alma baǵyn salý úshin jer suraǵan bolatyn.

Memleket basshysy alma baǵyna arnaıy oryn bólýdi Astana qalasynyń ákimi Baqyt Sultanovqa tapsyrǵan edi.