Elbasy tapsyrmasy: Aqtóbelikter páter qunynyń 10 paıyzyn tólep, baspanaly bola alady
Elbasy Nursultan Nazarbaev bıylǵy Joldaýynda halyqty baspanamen qamtamasyz etý úshin barlyq jaǵdaıdy jasaýdy tapsyrdy. Aqtóbe oblysy «Nurly jer» baǵdarlamasy aıasynda páter qunyna qajetti alǵashqy jarnany 10 paıyzǵa tómendetti. Búgin oblys ákimi Berdibek Saparbaev pen «Turǵyn úı qurylys jınaq banki» AQ basqarmasynyń tóraıymy Lázzat Ibragımova kelisimge qol qoıdy. Aldaǵy ýaqytta páter kezeginde turǵan adamdarǵa sertıfıkat beriledi.
«Prezıdenttiń halyqty baspanamen qamtamasyz etý týraly tapsyrmasyna oraı Turǵyn úı qurylys jınaq bankimen birge úlken jumys qolǵa alyndy. Banktiń aqtóbelik fılıalynda 90 myń adamnyń depozıti bar, olardyń ishinde 20 myń adam jergilikti atqarýshy organdarda baspana kezeginde tur. Búgin biz birden eki memorandýmǵa qol qoıyp, ózara qarym-qatynasty keńeıtemiz»,- dedi oblys ákimi Berdibek Saparbaev.
Oblys ákiminiń baspasóz qyzmetiniń habarlaýynsha, turǵyn úı sertıfıkatyn berý úshin oblys ákimdigi birinshi kezeńde 250 mıllıon teńge bóldi. Bul qarjy banktiń 500-den asa salymshysynyń alǵashqy jarnasyn tómendetýge múmkindik beredi. Ári «Nur Aqtóbe» yqsham aýdanynda 1 bólmeli 500 páter daıyn tur. Páterdiń bir sharshy metri - 100 -120 myń teńge. Baspananyń jalpy aýmaǵy 32-54 sharshy metr bolsa, salymshy baspana qunynyń tek 10 paıyzyn tóleıdi. Al ózgesi bıýdjetten bólinedi. Qaryz alýshy 5 jyl ishinde aı saıyn orta eseppen 8 250 teńge tólep, bıýdjet qarjysyn qaıtarady. Páter qunynyń qalǵan bóligin Turǵyn úı qurylys jınaq banki jyldyq mólsherlemesi 5 paıyzdyq jeńildetilgen nesıemen usynady.
«Aqtóbe oblysy Elbasy Joldaýy aıasynda turǵyn úı sertıfıkaty týraly memorandýmǵa elimizde birinshi bolyp qol qoıdy. Endi jalaqysy 60 myń teńge bolatyn adamdar da baspanaly bola alady. Aqtóbe oblysy - belsendi óńirlerdiń biri jáne nesıelik baspanany satyp alýda da respýblıka boıynsha kósh basynda tur», - dedi Lázzat Ibragımova.
