Elbasy tapsyrmasy: Aqtóbede 29 myńnan astam adam ataýly áleýmettik kómek alady
Aqtóbede oblys ákimi Ońdasyn Orazalınniń tóraǵalyǵymen Memleket basshysy, «Nur Otan» partııasynyń Tóraǵasy N.Nazarbaevtyń XVIII Sezdegi tapsyrmalaryn túsindirý boıynsha partııa aktıvi ótti. Aktıv jumysyna sezd delegattary, bastaýysh partııa uıymdarynyń jetekshileri, memlekettik mekeme basshylary, Aqtóbe qalasy jáne aýdan ákimderiniń orynbasarlary, eńbek ardagerleri, kásipkerler qatysty. Jıynda kópbalaly analarǵa kómek kórsetý joldary aıtyldy.
«Zańǵa ózgertýler engizilip, Elbasy tapsyrmalaryn oryndaý kezinde Aqtóbe oblysy boıynsha 29 myńnan astam adam ataýly áleýmettik kómek alady. Qazirgi ýaqytta respýblıkalyq jáne jergilikti bıýdjetten 903,8 mln teńge qarjy bólindi.Az qamtylǵan kópbalaly otbasylardy qoldaý maqsatynda respýblıkalyq bıýdjetten qosymsha 3585,1 mln teńge qarjy surastyryldy. Aqtóbe qalasy jáne aýdandarda oblys ákiminiń tapsyrmasyna oraı, birinshi kezekte az qamtylǵan jáne kópbalaly otbasylardyń jeke áleýmettik kartasyn toltyrý boıynsha jumystar júrgizilip jatyr. Bul shara eki aptanyń ishinde aıaqtalýy qajet. Áleýmettik karta árbir otbasynyń qajettiligin, áleýmettik-turmystyq jaǵdaıyn baǵalaýdy kózdeıdi jáne de ómirlik qıyn jaǵdaıynyń deńgeıin anyqtaıdy»,- dedi Aqtóbe oblystyq jumyspen qamtýdy úırestirý jáne áleýmettik baǵdarlamalar basqarmasynyń basshysy Qaırat Otarov.
Aqtóbede múgedektigi bar balalarǵa jáne jasy 18-den asqan, biraq bala kezinen birinshi toptaǵy múgedekterge kútim jasap otyrǵan 3590 adam bar. Olardyń járdemaqysy 31,1 myń teńgeden 40,5 myń teńgege deıin ósedi.
«Elbasynyń aýyldaǵy kópbalaly otbasylar úshin granttarǵa jáne shaǵyn nesıeleýge qosymsha kvota bólýdi tapsyrdy. Qazirgi kezde «Atameken» ulttyq kásipkerler palatasymen birlesip «Eńbek» memlekettik baǵdarlamasyna tıisti ózgerister engizilip jatyr. Máselen, aýyldardaǵy kópbalaly otbasylardy jumyspen qamtý, otbasy bıznesin ashý, tabystaryn arttyrý úshin qaıtarylmaıtyn 500 myń teńge kóleminde jańa bıznes ashý úshin memlekettik granttar beriledi. Qazirgi ýaqytta oblys boıynsha 100 AEK-ke deıingi granttardy usynýǵa kózdeldi. Bıznes ıdeıalardy iske asyrýǵa 86 adamǵa 21,6 mln teńge bólindi. Qosymsha 500 myń teńgege deıin memlekettik granttardy usyný úshin 182,4 mln teńge respýblıkalyq bıýdjetten suraldy», - dedi Aqtóbe oblystyq jumyspen qamtýdy úırestirý jáne áleýmettik baǵdarlamalar basqarmasynyń basshysy Qaırat Otarov.
Sonymen qatar, «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda jalpy 1048 adamdy, sonyń ishinde kópbalaly otbasylardy qosa alǵanda shaǵyn nesıeleýge 5 041,9 mln teńge berý josparlandy. Aýyl turatyn 976 adamǵa 3850,3 mln teńge, qalada turatyn 72 adamǵa 1191,6 mln teńge qarastyrylǵan.
