Elbasy tapsyrmasy: Aqmola oblysynda tarıfter tómendedi
«Memleket basshysy Nursultan Nazarbaev byltyrǵy jyldyń 7 qarashasynda tarıfti qalyptastyrý máselesine arnalǵan ótken Qaýipsizdik keńesiniń otyrysynda kommýnaldyq qyzmet aqylaryna qatysty birqatar naqtyly tapsyrmalar bergen bolatyn. Osyǵan oraı, oblysymyzda tarıfti qalyptastyrýdy baqylaý boıynsha oblys ákimi Málik Myrzalınniń 2018 jyldyń 23 qarashasyndaǵy ókimimen arnaıy jumys toby quryldy. Atalmysh jumys toby men oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń birlesken jumysynyń nátıjesinde 2019 jyldyń 1-shi qańtarynan bastap kommýnaldyq qyzmetter aqysy tómendetilip otyr», - dedi Aqmola oblysy boıynsha tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamenti basshysynyń orynbasary Áset Qurashev.
Departamenttiń deregi boıynsha, Kókshetaý qalasy ákimdigi janyndaǵy «Kókshetaý jylý» kommýnalyq kásipornynda qosymsha qun salyǵyn eseptegende 36 paıyzǵa tómendetilgen ýaqytsha mólsherli ótemaqy tarıfi bekitildi. ıAǵnı, 1 sharshy metr úshin tólemaqy 130 teńgeniń ornyna 82,21 teńgeni quraıdy. Al, «Kókshetaý sý arnasy» kommýnaldyq kásiporny aýyz sýy men sarqyndy sýǵa tarıfti 5 paıyzǵa tómendetti. Osylaısha baǵa 1 tekshe metr sý úshin 147,75 teńgeden 140,32 teńge tómendedi.
Sonymen qatar, jalpy kólemi 1,5 mıllıard teńge bolatyn ótemaqy tarıfteri ózge tabıǵı monopolııa sýbektilerine de engizilip otyr. «Kókshetaý energo ortalyǵy» jaýapkershiligi shekteýli seriktestigi elektr qýatynyń aqysyn 3,1 paıyzǵa kemitti. ıAǵnı, turǵyndar úshin elektr qýatynyń 1 kVt-nyń quny 16,11 teńgeden 15,11 teńgege deıin tómendedi. Sondaı-aq, «AREK-Energosbyt» jaýapkershiligi shekteýli seriktestiginiń qyzmetin alatyn tutynýshylarǵa tarıf 7,8 paıyzǵa arzandap, 1 kVt quny 17,37 teńgeden 16,02 teńgege arzandady.
Stepnogorsk qalasynda tarıfti tómendetý jylý energııasy jáne sý sharýashylyǵy júıesinde júzege asyrylýda. Máselen, qala turǵyndary úshin elektr qýatyna tarıf 10 paıyzǵa tómendep, 1 kVt quny 11,96 teńgeni qurady. Buryn qala boıynsha 1 kVt baǵasy 13,44 teńge bolǵan edi. Buǵan qosa, «Stepnogorsk - sý arnasy» kommýnaldyq sharýashylyǵy aýyzsý aqysyn 6,2 paıyz, qaldyq sýdy aǵyzý aqysyn 7,85 paıyz jáne qaldyq sýdy tazartý aqysyn 7,95 paıyzǵa tómendetti. Stepnogorsk Energosbyt» jaýapkershiligi shekteýli seriktestiginiń tutynýshylary qyzmet aqysyn 2019 jyldyń 1-shi qańtarynan bastap 6,42 paıyzǵa tómendetilgen baǵamen tóleıtin bolady.
«Jalpy, departament qysqa ýaqyttyń ishinde oblys boıynsha kommýnaldyq qyzmetter tarıfin 2,5 mıllıard teńgege tómendete aldy. Bir aıta keterligi tarıfterdi tómendetý qyzmet sapasy men ınvestıtsııalyq mindettemeleriniń kólemine áser etpeýi tıis», - dep atap ótti Áset Qurashev.
