Elbasy tapsyrmalaryn oryndaý Qazaqstan JІÓ ósimin 0,3% tarmaqqa arttyrady - sarapshy
Bul pikirdi «Ekonomıkalyq zertteýler ınstıtýty» AQ Taldaý jáne álemdik ekonomıka ortalyǵynyń dırektory Aıbol Arǵynǵazınov bildirdi, dep habarlaıdy QazAqparat.
Sarapshy Memleket basshysynyń «Nur Otan» partııasynyń XVIII sezinde kótergen tabysy tómen azamattardy qoldaý men óńirlik damýdaǵy aıyrmashylyqtardy kemitý jónindegi tapsyrmasy mezgili jetken másele ekenin atap ótti. Bul maqsatta aldaǵy 3 jylda Ulttyq qordan qosymsha 1 trıllıon 350 mıllıard teńge bólinedi. Al bıyl Ulttyq qordan 250 mıllıard teńge bólý kózdelgen.
«Ekonomıkalyq zertteýler ınstıtýtynyń boljamy boıynsha, basqa faktorlardy eskermegenniń ózinde tek Memleket basshysynyń bastamalaryn iske asyrý Qazaqstannyń JІÓ-niń ósýin 0,3 paıyzdyq tarmaqqa arttyrady. Jalaqysy tómen jáne áleýmettik az qorǵalǵan qoǵam músheleriniń tabysynyń artýyna baılanysty ekonomıkanyń ósýi ınklıýzıvti bola túsedi, ıaǵnı áleýmettik damý, tsıfrlyq jáne basqa da teńdikterge negizdeledi», - dedi ekonomıst.
Onyń aıtýynsha, 2019 jylǵy 1 aqpandaǵy jaǵdaı boıynsha elimizdegi aqsha massasynyń kólemi 21,4 trln teńgeni qurap otyr. Qosymsha bólinetin 250 mıllıard teńge jyldyń ekinshi bóliginde teńdeı bóliktermen bólinetindikten, ınflıatsııalyq úrdisterge yqpal etpeıdi.
«Kepildendirilgen transfertterdi qosa alǵanda Ulttyq qordan jalpy transfertterdiń kólemi 2019 jyly 2,7 trln teńgeni quraıdy. Bul soma 2018 jylǵy somamen shamalas (2,6 trln teńge) jáne 2017 jylǵy somadan tómen (4,4 trln teńge). Ulttyq qordan ekonomıkaǵa qomaqty qarjy bólinýine qaramastan, 2017 jyly ınflıatsııa bekitilgen dáliz sheńberinde qalyp, 2016 jylǵa qatysty tómendegen bolatyn. 2020 jáne 2021 jyldary Ulttyq qordan áleýmettik qoldaýǵa bólinetin qarajat (1,1 trln teńge) teńdeı bólinetindikten, transfertterdiń jalpy kólemi sáıkesinshe 2,85 trln jáne 2,55 trln teńgeni quraıdy. Bul soma 2018 jylǵy kórsetkishpen bir shamada, al 2017 jyldan tómen. Osylaısha, bizdiń esepteýlerimiz boıynsha 2019 jyly ınflıatsııa deńgeıi Qazaqstan Respýblıkasy Ulttyq banki belgilegen dáliz sheńberinde saqtalady», - dedi Aıbol Arǵynǵazınov.
