Elbasy tapsyrmalary múltiksiz oryndalýy kerek - Baqytjan Saǵyntaev
ORAL. QazAqparat - Elbasy tapsyrmalary múltiksiz oryndalýy kerek. Bul týraly búgin Oralda oblys aktıvi jáne bıznes ókilderimen jobalyq basqarý júıesi máseleleri boıynsha kezdesý ótkizgen QR Premer-Mınıstri Baqytjan Saǵyntaev málim etti, dep habarlaıdy QazAqparat tilshisi.
Úkimet basshysynyń atap ótkenindeı, Memleket basshysy bıylǵy mamyr aıyndaǵy BQO-ǵa jumys sapary kezinde birqatar tapsyrmalar júktegeni málim.
Osyǵan oraı Úkimette jospar jasalyp, bekitildi. QR Premer-Mınıstriniń birinshi orynbasary Asqar Mamın tórt jınalys ótkizdi. Qazir bulardyń bári Úkimettiń turaqty baqylaýynda.
Jıynda Úkimet basshysynyń orynbasary Erbolat Dosaev selektorlyq baılanys arqyly Elbasy tapsyrmalarynyń qalaı oryndalyp jatqanyn baıandap berdi.
Birinshiden, óńirde respýblıkalyq mańyzy bar joldardy kúrdeli jóndeý máselesi boıynsha qos tapsyrma berilgen edi. Bul oraıda Jalpaqtal-Qaztalov baǵytyndaǵy joldy kúrdeli jóndeý jumysy bastalyp, buǵan respýblıkalyq bıýdjetten 1 mlrd teńge bólindi. Uzyndyǵy 245 shaqyrym Qaztalov-Jánibek-RF shekarasy-Bısen-Saıqyn jolyn salý úshin jobalyq-smetalyq qujattama jasaıtyn jobalyq uıym belgilendi. Barlyq qarajat qarastyryldy. Sondaı-aq uzyndyǵy 141 km Podstepnyı-Fedorov-RF shekarasy jolyn qaıta jańartý jumysyn kelesi jyly bastap, 2021 jyly aıaqtaý kózdelýde. Bul maqsatqa 17,3 mlrd teńge kóleminde qarjylaı qoldaý kórsetildi. Qazirgi kezde jobalyq-smetalyq qujattama jasaý úshin konkýrstyq rásim júrgizilýde.
Ekinshiden, ishki naryqqa munaı ónimi kólemin ulǵaıtý maqsatynda «Kondensat» AQ-ny shıkizatpen qamtý úshin kásiporyn munaı tasymaldanatyn kestege engizildi. Kestege sáıkes shilde aıyna 15 myń tonna kóleminde kvota bekitildi. Bul baǵyttaǵy jumys jalǵasady.
Úshinshiden, qorǵanys ónerkásibi kesheni salasyndaǵy «Batys Qazaqstan mashına jasaý kompanııasy», «Oral «Zenıt» zaýyty», «Gıdroprıbor» ǴZI syndy kásiporyndardy memlekettik tapsyrystarmen qamtý baǵytynda naqty sharalar qabyldandy.
Tórtinshiden, «Omega» prıbor jasaý zaýytynyń 100 paıyz aktsııasyn «Oral transformator zaýytyna» senimgerlik basqarýǵa berý máselesi sheshilý ústinde.
Budan keıin Batys Qazaqstan oblysynyń ákimi Altaı Kólginov jáne mınıstrlikter basshylary sóz alyp, bıylǵy alǵashqy jartyjyldyq qorytyndylaryna, sonyń ishinde keıbir kórsetkishterdiń kemshin túsip jatqanyna, olardy birlesip joıý joldaryna toqtaldy.
Jıyndy qorytyndylaǵan Úkimet basshysy Batys Qazaqstan oblysynda atqarylǵan jumystarǵa oń baǵa bere otyryp, jyl saıyn elimizdiń damýynda alǵa basýshylyqtarǵa qol jetkizý úshin óńirlerdiń de soǵan saı bolýy kerektigin atap kórsetti.
«Oblysta Elbasy tapsyrmasyna sáıkes joldar men áleýmettik nysandar salynýda. Agroónerkásip kesheninde qaıta óńdeý kásiporyndary tabysqa jetip keledi. Munymen toqtap qalmaı, basqa salalardy da damytý kerek. Mysaly, Qarashyǵanaq kenishinde óndiristik kórsetkishter bar, ınvestıtsııa quıylýda. Áıtse de qazaqstandyq úles oıdaǵydaı bolmaı otyr. Ol 1-2 paıyzǵa emes, odan kóbirek nege óspeıdi. 56 paıyz da az, 96 paıyzǵa nege jetkizbeske. Qazaqstandyq úles kóbeıse, jergilikti kásiporyndar da damyp, tynysy ashylady. Sonymen qatar qazaqstandyq kadrlardy daıarlaý máselesin de umytpaý qajet. Qolynan jumys keletin adamdardy oqytyp, qajetti salaǵa qosýdyń mańyzy zor. Tsıfrlandyrý, óndiris oryndaryn jańǵyrtý jumystaryn odan ári jalǵastyrý kerek», dedi Baqytjan Saǵyntaev. 
