Elbasy tapsyrmalary halyqtyń ishki únine ún qosty -Doshan Joljaqsynov
«Kez kelgen memleket damýynyń basty sharty - eń aldymen halqynyń áleýmettik jaǵdaıy, turmysy, baqýatty ómir súrýi. Sol shart bizde de bar. Búginde halqymyzdyń sany ósip, ókinishke oraı áleýmettik jaǵdaıy tómen kópbalaly analar, baspanaǵa zárý jastar artyp otyrǵany shyndyq. Prezıdentimiz mundaı kemshilikterdi joıý úshin Úkimettiń aldyna qadaý-qadaý tapsyrmalar júktegen edi. Alaıda bul mindetter 100 paıyz oryndalmaǵannan soń, istelmegen sharalardyń «quıryǵy qyltıyp» jatqannan keıin Elbasy Úkimetti bosatty. Al taıaýda ótken Nur «Otan» partııasynyń kezekti sezinde Memleket basshysy halyqtyń ál-aýqatyn arttyrý, kópbalaly otbasylardyń jaǵdaıyn kóterý, baspana, jastar máselesin kóterdi. Jalpy, halyqtyń tynys-tirshiligin bildiretin negizgi máselelerdiń barlyǵyn qamtyldy», - dedi ol.
Kópbalaly otbasyda dúnıege kelgen Doshan Joljaqsynov Elbasynyń kópbalaly analarǵa jiti nazar aýdaryp, olardyń áleýmettik jaǵdaıyn jaqsartýǵa baǵyttalǵan tapsyrmalaryna rızashylyq tanytty.
«Sheshem jaryqtyq ákem ekeýi 2 ul, 8 qyz ósirdi. Biraq, ol Keńes zamany edi. Sonyń ózinde kónbis halyqtyń jaǵdaıy asa jaqsy bola qoıǵan joq. Beıbitshiliktiń arqasynda, ásirse, aýylda «Bir jaǵadan bas, bir jeńnen qol» shyǵaryp ómir súrdi. Al qazir zaman ózgerip kele jatyr. Zaman ózgergen saıyn halyqtyń sanasy da kóterilip keledi. Halyq salaýatty ómir súrýmen qatar kez kelgen pendeniń basyndaǵy búkil problemadan ajyraǵysy keledi. Jaqsy ómir súrgisi, jaqsy tamaq ishkisi, jaqsy urpaq ósirgisi keledi. Mine, osy turǵydan kelgende sezde halyq kútip otyrǵan máseleler laıyqty deńgeıde kóterildi. Elbasy tapsyrmalary halyqtyń ishki únine ún qosty. Kópbalaly analarǵa jan-jaqty kómek kórsetý máselesi basty shartqa aınaldy. Mine osy dúnıelerge kelgende memleketimiz jańa bir órkenıettikke órlep keledi», - dedi tanymal teatr jáne kıno akteri.
Sonymen qatar ol ustazdardyń, dárigerler, sport jáne óner adamdarynyń jalaqysy kóteriletindigi de qýanarlyq jańalyq ekendigin basa aıtty.
«Memleket nazaryna ustazdardyń, medıtsına qyzmetkerleriniń jalaqysy iligip, onyń ósetindigi óte qýantarlyq jaıt. Aılyǵy shaılyǵyna jetpeıtin óner, sport adamdarynyń da jalaqysynyń artatyndyǵy eldiń eńsesin kóterdi. Elbasymyzdy «jarǵaq qulaǵy jastyqqa tımeı» oılanyp júrgen másele halqynyń áleýmettik jaǵdaıy edi. Endi mine ol aldaǵy ýaqytta óziniń oń sheshimin tabatyn boldy», -dedi Qazaqstannyń halyq ártisi.
Doshan Qanaıuly suhbat barysynda QR Prezıdenti Nursultan Nazarbaevtyń ótken jyldyń 21 qarashasynda jaryq kórgen «Uly dalanyń jeti qyry» atty maqalasyna da pikirin bildirip ótti.
«Qazaqta bala tárbıesi esh ýaqytta kún tártibinen túspegen dúnıe. Degenmen, búgin zamannyń ozýyna, tehnologııalyq jańalyqtarǵa baılanysty kelesi býyn odan ajyrap bara jatqandaı. Sondyqtan bul maqala der kezinde jarııalandy. Óıtkeni, tarıhyn bilmegen bala boıyna ultyna, jerine, ótken tarıhyna degen uly súıispenshilikti sińirmeıdi. Al ondaı jastardy ultyna janashyr, otansúıgish bolady dep aıtýdyń ózi qıyn. Demek, atalǵan maqaladan týyndaıtyn mindetterdi tarıhshylarymyz, zııaly qaýym ókilderi dittegen jerine jetkizip iske asyratyn bolsa, onda úlken sharýa bolǵaly tur», - dedi kıno akteri.
Osy oraıda Memlekettik syılyqtyń ıegeri taǵdyrymyzǵa tartý bolǵan Táýelsizdik qadirin jastarymyzdyń sanasynda máńgi sińýi tıis ekendigin atap ótti.
«Táýelsizdiktiń tolaıym tabystary bizdiń ýysymyzǵa birden túse qalmaǵany ras. Ol eń aldymen Elbasynyń ólsheýsiz iri qımyldarynyń, ekinshi halqymyzdyń jarasymdy tatýlyǵynyń arqasynda keldi. Tuńǵysh Prezıdentimizdiń tuǵyry berik, turpaty bólek saıasatynyń arqasynda damyǵan memleket qura aldyq. Táýelsizdik men úshin máńgilik mahabbat sııaqty. Óıtkeni, adamnyń júregi qartaıǵanyna qaramaı, únemi ǵashyq bolady. Táýelsizdik te dál solaı. Al endi sol táýelsizdikke shynaıy ǵashyqpyz ba? Biz osy jaǵyn aıyryp alýymyz kerek. Óıtkeni onsyz eshteńe bolmaıdy. Muny tarazyǵa salyp ólsheýge kelmeıdi. Búgingi bolyp jatqan qubylystardyń barlyǵyn shynaıy bostandyqtyń ólshemimen ólsheýimiz kerek. «Anaý bolmady, mynaý bolmady» degen qańqý sóz, teris uǵym bolmaýy tıis. Táýelsizdik bizge múmkindik retinde berilip otyr. Sol múmkindikti biz qalaı paıdalanyp otyrmyz? Ony kúsheıtýge qanshalyqty kúsh salyp jatyrmyz? Osyny nazardan tys qaldyrmaýymyz qajet», - dedi Doshan Qalıuly.
Qazaqstannyń halyq ártisi Jastar jylyna qatysty da pikirimen bólisti.
«Cherchıll: «Jastardyń keleshine qarjy salý, náresteniń aýyzyna ana sútin tosqanmen birdeı», degen eken. Bul qaǵıdaly sóz. Osydan aıyrylmaýymyz kerek. Osy turǵydan kelgende buqara halyqpen, onyń ishinde jastarmen tyǵyz jumys isteıtin oblystardaǵy, aýdandardaǵy, aýyldardaǵy ákim-qaralar olarǵa úlken adamgershilik, aǵalyq qamqorlyq, úlken meıirbandyq tanytsa eken», - dep túıindedi sózin Doshan Joljaqsynov.
Foto: voxpopuli.kz