Elbasy suhbaty: Prezıdent ótirik aıta ma?
ASTANA. QazAqparat - Búgin Memleket basshysy Nursultan Nazarbaev aǵymdaǵy jyldy qorytyndylap telearna jýrnalısterine suhbat bergen bolatyn. Bir saǵat boıy áńgimelesý barysynda túrli saýaldar qoıyldy.
Sonyń birinde jýrnalıst Beısen Quranbek: «El múddesi úshin neshe túrli kelissózder bolady, shyndyqty aıtpaıtyn kezińiz boldy ma?» dep suraǵan edi. «Ótirik aıtý degen jaman qasıet. Dosyńa ótirikti birinshi ret aıtsań saǵan senbeıdi, ekinshi ret aıtsań, abyroıyńnan aıyrylasyń. Al el basqaryp júrgen adamnyń jaǵdaıy erekshe, ártúrli oqıǵalar bolyp jatady. Eldi basqaryp otyrǵan adamnyń aýzynan barsha Qazaqstan halqynyń atynan aıtylatyn sóz shyǵady. Keıde kelissózge kelý úshin bir nárseden keıin sheginip, ekinshi jaǵyn alǵa shyǵarýǵa týra keledi», - dedi N.Nazarbaev. Bul rette Elbasy Kaspıı teńizin bólý, Reseımen shekarany bólý máselesinde Eltsınmen aradaǵy bolǵan áńgimelerdi de mysalǵa tartty. «Kóp jaǵdaıda elge tıimdi sheshim qabyldaısyń. Degenmen, bul ońaı emes. Buǵan deıin kim el basqaryp, memleketti basqaryp kórdi deısiń? Bul bizdiń tuńǵysh tájirıbemiz. Bizdiń jolymyzdyń oń jaǵy da, sol jaǵy da bar», - dedi N.Nazarbaev.
