Elbasy suhbaty elimizdiń bolashaqqa degen senimin arttyrdy
ALMATY. QazAqparat - Elbasy N.Nazarbaevtyń Ulytaýda bergen suhbatyna qatysty tarıhshylar, zııaly qaýym ókilderi de óz pikirlerin bildirýde. Keleli áńgime kópshilik tarapynan asa jyly qabyldandy. Halyq tamyryn dóp basqan suhbat kópshiliktiń kúdigin seıiltip, eldiń bolashaqqa degen senimin nyǵaıtty.
Ulytaýda aıtylǵan túıdek-túıdek oılarǵa qatysty óz pikirin Ál-Farabı atyndaǵy QazUÝ dotsenti, ekonomıka ǵylymdarynyń kandıdaty Ajar Beısenbaeva bildirdi.
«Prezıdent óz sózinde qazaq úshin óte kókeıkesti til, din, ultaralyq tatýlyq, tarıh máselelerin tilge tıek etti. Ásirese, Qazaqstan ekonomıkasy jóninde mańyzdy máselelerdi sheshýdegi aıqyn jol bar ekenin atap ótti. Sonyń ishinde búkilálemdik Saýda Uıymyna kirer aldyndaǵy Eýrazııalyq ekonomıkalyq qaýymdastyq aıasyndaǵy atqaryp jatqan is-sharalardyń elimizdiń ekonomıkasyn nyǵaıtý maqsatynda júrgizilip jatqany aıan. Elbasy muny óte durys atady. Qazirgi jahandaný zamanynda óz-ózinen tuıyqtalýǵa bolmaıdy. Meılinshe ózge eldermen ekonomıkalyq jáne tehnologııalyq qarym-qatynastardy damytý qajet. Ekonomıkalyq ıntegratsııa damýǵa ákeledi. Eń aldymen, syrtqy ekonomıkalyq baılanysymyzdy nyǵaıtyp, eksporttyq potentsıaldy arttyrýǵa septigin tıgizbek. Sonymen qatar, EO múshelerinen Qazaqstanǵa ınvestıtsııa tartýǵa mol múmkindik ashylady. Ol óz kezeginde damýǵa serpin beretin ınnovatsııalyq tehnologııalar, bilim, tájirıbe almasý bolyp tabylady», - dedi ol.
Prezıdent qazirgi saıası ahýal aıasynda, ıaǵnı odaqtasymyz Reseıge Eýroodaq tarapynan qoıylyp jatqan sanktsııalardyń saldaryn da tıimdi paıdalaný joldaryn kórsetti, deıdi maman.
«Eýroodaqtyń qatań qadamdarynyń esebinen basqa elderge eksport aýqymyn arttyrý múmkindigi joǵarylaıtynyna kóz jetkizdi. Biz osyny paıdalanyp, Reseı naryǵyndaǵy úlesimizdi arttyrýymyz kerek. Aýylsharýashylyq ónimderinen basqa shıkizat ónimderin de eksporttaý kólemin arttyrýymyz kerek», - dedi maman.
Ekonomıst ǵalym ár aıtylǵan pikirdiń temirdeı berik negizdemesi bolýy kerek dep sanaıdy.
«Qazirgi aqparat zamanynda qoǵamdyq pikir týǵyzý ońaıdyń ońaıy bolyp ketti. Áleýmettik jeli arqyly halyqtyń úreıin ushyryp jatqandar qanshama. Mańyzdy suhbat keıbir saıasatkerlerdiń ekonomıkamyzǵa keri áser etetindigi jónindegi pikirin muqııat saraptap baryp oıyn bildirýin mindettedi», - dep qorytyndylady oıyn Ajar Beısenbaeva.
