Elbasy soǵys jyldaryndaǵy náýbetter qaıtalanbas úshin bar kúshin salýda - I.Tasmaǵambetov
Bul týraly búgin Elbasynyń tapsyrmasy boıynsha UOS-nyń elordalyq ardagerleri men tyl eńbekkerlerine memlekettik nagradalardy tabys etý saltanatynda Astana qalasynyń ákimi Imanǵalı Tasmaǵambetov aıtty.
Memleket basshysynyń Semeı ıadrolyq polıgonyn jabý jáne sol kezde Qazaqstan aýmaǵynda ornalasqan 1100 ıadrolyq oqtumsyqty joıý týraly alǵashqy Jarlyǵy, tek bizdiń elde ǵana emes, sondaı-aq búkil álemde beıbit ornatý úshin - Qazaqstannyń qosqan zor úlesi boldy. Qazaqstannyń táýelsiz jas memleket retinde qarýsyzdaný úrdisine qosqan qomaqty úlesi Amerıkada ótken ıAdrolyq qaýipsizdik jónindegi jahandyq sammıtte de atap ótildi. Táýelsizdigimizdiń alǵashqy kúninen bastap Elbasy sondaı-aq, ultaralyq tatýlyq pen konfessııaralyq tózimdilik týraly aıtyp keledi. Munyń bári dostyq pen kelisimde ómir súrý úshin jasalýda», - dedi ol.
I.Tasmaǵambetov Qazaqstan az ǵana jyldar ishinde qarqyndy damyp, jyldan-jylǵa joǵary ekonomıkalyq kórsetkishter kórsetip otyrǵanyn, ekonomıkalyq qıyn-qystaý kezeńde el astanasyn aýystyrý ońaıǵa soqpaǵanymen ol durys sheshim bolǵanyn atap ótti.
«Meniń oıymsha, Astanany aýystyrý kezinde Elbasy óziniń artynda senimdi halqy bar ekenin, ony qaıratty urpaq qoldap otyrǵanyn bildi. Ony bul sheshimde qoldaǵandardyń biri ardagerler boldy. Eldegi beıbitshilik pen onyń ekonomıkalyq órrkendeýine ardagerlerdiń qosyp otyrǵan úlesi ushan-teńiz dep bilemin. Qazirgi urpaq sizderdiń jaýyngerlik erlikterińiz ben nagradalaryńyzǵa tańdanyp qana qoımaı, ózderi de Otandary úshin soǵan uqsas «erlik» jasaýǵa tyrysýda. Eń qýanyshtysy, olar óz ıdeıalaryn beıbit ómirde júzege asyra alady», - dedi ol ardagerlerge qaratyp aıtqan sózinde.
