Elbasy shyrshasyna qatysqan búldirshinderge iPad syıǵa berildi

Aıta ketý kerek, mundaı merekelik shara qazir elimizdiń ár qalasynda ótip jatyr. Búgin bul shyrshaǵa ata-anasynyń qamqorlyǵynsyz qalǵan 3000 bala qatysyp jatyr.

Memleket basshysy Nursultan Nazarbaev LED ekran arqyly balalardy quttyqtap, jańajyldyq tilegin jetkizdi.

«Aınalaıyn balalar. Men bárińe mol ıgilik, jarqyn bolashaq tileımin. Balalyq shaqtaryń bazarly, ómirleriń ajarly bolsyn. Jańa jylda táýelsiz elimizben birge ósip-ónip, órkendeı berińder. Armandaryń oryndalsyn. Merekelerińmen!», - dedi Memleket basshysy.

Saltanatty sharaǵa kelgen qala ákimi Baýyrjan Baıbek te balalarǵa quttyqtaý tilegin jetkizdi.

 «Sizderdi búgin Elbasy alǵashqy bolyp quttyqtap jatyr. Dál qazir bizdiń óńirlerimizde sizder sııaqty balalar qýanyshpen qatysyp jatyr. Búginde elimizde 3000 bala Elbasy shyrshasyna keldi. Bul sizder úshin úlken jetistik. Kelesi jyl sizderge jańa baqyt ákeledi dep senemiz. Qazir Elbasy atynan keremet syılyq alasyzdar. Búginde eń mańyzdy másele - jańa tehnologııalar. Syılyqtardyń arasynda I Pad planshetteri, sportpen shuǵyldanam degenderge sport kıimderi,  oqý quraldary bar. Sizderdiń eń basty maqsattaryńyz densaýlyqty saqtaı otyryp,  bilim alý», - dedi qala ákimi Baýyrjan Baıbek.

Saltanatty shara ertegi keıipkerleri men balalardyń, Aıaz ata men Aqshaqardyń shyrshany aınalǵan qyzyqty kórinisine jalǵasty.

Buǵan ákim Baýyrjan Baıbek te qatysty.

Búldirshinderge túrli mýzykalyq ujymdar, ánshi Mádına Sádýaqasova, Jigitter kvarteti taǵy basqa ónerpazdar ánnen shashý shashty.

Sońynda balalar arnaıy jaıylǵan dastarhannan dám tatty.

Merekelik sharaǵa qatysqan 200 balanyń árqaısysyna arnaıy syılyq salynǵan qobdıshalar tabystaldy. Aıta ketý kerek, ár syılyq jınaǵynda sporttyq kıimder, keńselik taýarlar, táttiler, planshet taǵy basqa syılyqtar kirgen. Olardyń árqaısysy ár balanyń boıy men jas ereksheligine qaraı alynǵan.