Elbasy ShQO halqyn Astananyń 20 jyldyq toıymen quttyqtady
Oblys ákiminiń baspasóz qyzmetiniń habarlaýynsha, Memleket basshysy Shyǵys Qazaqstan oblysynyń elordanyń týǵan kúnine jasaǵan tartýy erekshe syı bolǵanyn ataǵan.
«Qurmetti Danıal Kenjetaıuly! Sizdi jáne búkil Shyǵys Qazaqstan oblysynyń jurtshylyǵyn Astananyń 20 jyldyǵymen shyn júrekten quttyqtaımyn. Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqtarǵa ortaq qýanysh. Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty.
«Óńirlerdiń Astanaǵa tartýy» jobasy aıasynda Shyǵys Qazaqstan oblysy da elordaǵa erekshe syı jasady. Zamanaýı tehnologııalardy qoldana otyryp Botanıkalyq baq aýmaǵynda salynǵan jaryqty-mýzykaly sýburqaq baqtyń sánine sán qosqan nysan boldy. Bul jer elorda turǵyndary men qonaqtary serýendeıtin súıikti demalys ornyna aınalatynyna senimdimin. Astanany kórkeıtýge zor úles qosqan Sizge jáne óńir turǵyndaryna shynaıy rızashylyǵymdy bildiremin. Sizderge zor densaýlyq, baq-bereke tileımin» - delingen quttyqtaý hatta.
Aıta keteıik, Shyǵys Qazaqstannyń bul tartýy Astanadaǵy eń úlken sýburqaq retinde tirkeldi. Alyp sýburqaqtyń formasy sheńber tárizdi. Syrtqy dıametri 73 metrdi quraıdy. Keshenniń dál ortasynda bıiktigi 6,5 metr taıqazan ornalasqan. Sý beıne bir osy qazannyń ishinen qaınap shyǵyp jatqandaı kórinis beredi.
Fontannyń taǵy bir ereksheligi - aspanǵa shapshyp jatqan sýdyń qaıdan shyǵyp, qaıda sińip jatqanyn ańdaý qıyn. Taıqazannan atqylaǵan sý jerge sińip jatqandaı áser beredi. Al shyndyǵynda ol alańdaǵy súzgiden ótip, jasyryn qoımaǵa jetedi. San túrli shamdarmen kómkerilgen áýezdi sýburqaqtyń ornatýǵa 938 mıllıon teńge jumsalǵan.
