Elbasy sheteldik ınvestorlardyń kelesi jylǵy otyrysynyń taqyrybyn usyndy
ASTANA. QazAqparat - Elordada ótip jatqan Sheteldik ınvestorlar keńesiniń 30-shy jalpy otyrysynda QR Prezıdenti Nursultan Nazarbaev keńestiń 31-otyrysyn «Jedeldetilgen jańǵyrtý» taqyrybymen ótkizýdi usyndy, dep habarlaıdy QazAqparat.
«Búgingi otyrysta aıtylǵan barlyq usynystar bizdiń munan arǵy jumysymyzda eskeriletin bolady. Tolyqtaı alǵanda keńestiń kópjyldyq jumysy joǵary baǵalaýǵa laıyqty. Bizdiń aldymyzda qazirgi ýaqytta jańa mindetter tur. Biz birneshe kezeńnen óttik jáne sizder kómektestińizder. Búginde bizdiń jumysymyzda birneshe mańyzdy memlekettik baǵdarlama bar», - dedi Elbasy.
QR Prezıdenti elimizde ındýstrııaldy-ınnovatsııalyq baǵdarlamany, 5 myń shaqyrym avtomobıl jolyn jáne birneshe myń temirjoldardy salýdy, áýejaılardy jáne Kaspıı teńizindegi portty retke keltirýdi kózdeıtin 5 jyldyq ınfraqurylymdyq baǵdarlamany belsendi júrgizý jalǵasatyndyǵyn basa aıtty.
«Birinshi kezekte, bizdiń aldymyzda ekonomıkany jedeldetilgen tehnologııalyq jańǵyrtý mindeti tur. Bul jaıynda men Joldaýymda aıtqan bolatynmyn. Dástúrli salalarmen qatar ınnovatsııa men tsıfrlyq tehnologııany qoldana otyryp jańa ındýstrııany damytý qajet», - dedi Nursultan Nazarbaev.
Memleket basshysy munyń barlyǵy da aýqymdy ınvestıtsııany, bilikti kadrlar men belsendi jumystardy qajet etetindigin atap ótti.
Sondyqtan keńestiń kelesi jalpy otyrysyn «Jedeldetilgen jańǵyrtý» taqyrybymen ótkizýdi usynamyn. Eger sizderdiń taraptaryńyzdan qarsylyq bolsa, onda biz bul taqyrypty bekite alar edik», - dedi Qazaqstan Prezıdenti.
Sheteldik ınvestorlar keńesiniń músheleri Elbasy usynysyn qoldady.
Aıta keteıik, Sheteldik ınvestorlary keńesi Qazaqstan Prezıdentiniń tóraǵalyǵymen ótetin keńesshi-konsýltatıvti organ bolyp sanalady. Keńes 1998 jyly eldegi ınvestıtsııalyq qyzmet pen ınvestıtsııalyq ahýaldy jaqsartýmen tikeleı baılanysty ózekti máselelerdi tıimdi sheshý úshin memleket pen sheteldik ınvestorlar arasyndaǵy tikeleı únqatysýdy qamtamasyz etý maqsatynda qurylǵan. Eldiń ınvestıtsııalyq saıasaty men ekonomıkalyq damýynyń basty aspektileri boıynsha Qazaqstan Prezıdenti men Úkimetiniń qaraýyna usynymdar men usynystardy ázirleý Keńestiń basty mindeti sanalady.
