Elbasy: Sheteldegi qarajatty qaıtaryńdar da, Qazaqstanda ustańdar
«Osy ýaqytqa deıin biz aqshany zańdastyrýdy úsh ret ótkizdik. Eshkimge tıispeımiz dedik. Solaı boldy. Bir adamdy jaýapqa tarttyq pa? Bireýdiń astyn qazbaladyq pa? Joq, eshkimge tıisken joqpyz. Qazirgi jaǵdaıda sizder shekaranyń arǵy jaǵynda ustap otyrǵan aqshalaryńyzdan aıyrylasyzdar! Ózderiniz sezip jatqan bolarsyz. Sanktsııalyq soǵys qyzyp tur. Ondaıda sizderge eshkim kómektese almaıdy. Aqshany Qazaqstanǵa qaıtaryńdar da, osynda ustańdar! Qandaı kepildik kerek? Men tıisti zańdardy da, jarlyqtardy da shyǵaryp beremin. Olaı istemeımin deseńder, biz ózimiz isteımiz. Artynan renish bolmasyn», - dedi Nursultan Nazarbaev búgin Indýstrııalandyrý kúnine arnalǵan jalpyulttyq telekópir kezinde.
Prezıdenttiń aıtýynsha, búginde 18 otandyq kompanııa 12,5 mlrd dollardy shetelde ustap otyr. Atap aıtqanda, «Teńiz Shevroıl» kompanııasy - 4,5 mlrd dollar, «QazMunaıGaz» ulttyq kompanııasy - 3 mlrd dollar, «QazMunaıGaz barlaý men óndirý» kompanııasy - 2 mlrd dollar, «Azııa gaz qubyry» JShS - 1 mlrd-tan astam, «Beıneý-Shymkent» gaz qubyry» JShS - 100 mln dollar, budan bólek, «Shyǵys Tsement», «Jaıyq Munaı», Kaspıı qubyry konsortsıýmy jáne taǵy basqa kompanııalar shetelde qyrýar qarajatty ustap keledi.
«Nege olaı isteısizder? Qazaqstannyń resýrstaryn satyp, aqsha tabasyzdar? Al tabysty shetelde ustaısyzdar. Nege ol aqsha osynda aınalyp, el ekonomıkasyna jumys istemeıdi? Jarty jyldyń ishinde memleketke qarasty kompanııalar sheteldegi qarjysyn 2 mlrd dollardan 6 mlrd-qa deıin ulǵaıtty. Sizder neni kútip otyrsyzdar?! Men osyny túsinbeımin», - dep atap kórsetti Prezıdent.
Osy oraıda Memleket basshysy árbir kompanııa basshysymen jeke-jeke sóılesýdi tapsyrdy. Atalǵan mindet Úkimet basshysy Baqytjan Saǵyntaevqa júkteldi.
«Aqshany qaıtarmasa, men olarmen basqasha sóılesemin. Osyny búkil Qazaqstannyń aldynda eskertip qoıaıyn. Biz ol aqshany qaıtarýdyń jolyn tabamyz. Biraq ol kezde sizder bolmaısyzdar. Sizderge jaman bir nárse isteımiz dep otyrǵan joqpyn. Memleket sizderge aqsha jasaýǵa jaǵdaı jasady. Sizder bolsa, ol aqshany memleketten tyǵyp otyrsyzdar. Olaı bolmaıdy. Jetedi osymen», - dedi Nursultan Ábishuly.
