Elbasy sheshim qabyldaýda ishki sezimge senim artady
ASTANA. QazAqparat - Búgin otandyq telearnalarǵa suhbat bergen QR Prezıdenti Nursultan Nazarbaev sheshim qabyldaýda ishki sezimge jıi senim artatyndyǵyn aıtty.
«Á degende árıne, tájirıbege júginesiń. Taǵaıyndaıtyn adamdardy bilesiń, istep júrgenin, kimniń qalaı ekenin. Bárin tarazyǵa salyp, qaısysy degen kez shynymdy aıtsam men úshin eń qıyn másele osy. Birinshiden, ózim taǵaıyndaǵan azamattardyń sol jumysty isteı almaı, jumystan bosatqan kezde qınalamyn. Sebebi onyń ózin ǵana emes, balalaryn, aǵaıyn-týǵandaryn oılaımyn. Mynanyń aıaǵy shalys ketip, barlyǵy qınalady-aý dep, mynany qazir jumystan alyp tastasam, ózi de, barlyǵy da qınalady-aý dep oılaımyn. Odan keıin naq taýyp, dóp taýyp, erteń jumys istep ketetini qaısysy eken dep, oǵan da qatty qınalatynym ras. Al endi tıisti adamdy taýyp, ornyna qoıý ol da az sheshim emes», - dedi QR Prezıdenti. Elbasynyń atap ótýinshe, bir adam birinshi basshy bolǵanda ózin kórsete alady. Ekinshisi ómir-baqı ekinshi orynda tursa, úshinshi bireý úshinshi orynda ózin kórsetedi. Al kadr tańdaýda qatelik jiberý búkil elge, memleketke zııanyn tıgizýi múmkin. «Mysaly, aıtaıyq, Almatydan Astanany osy jerge alyp kelý ońaı sharýa ma? Oılaısyń, erteń ana jaqqa ushaqqa otyryp baraıyn dep. Baraıyn dep turasyń ǵoı, biraq birdeńe saǵan «barma» dep turady - ishki túısik. Túısik degen sóz, qazaqta túısiksiz ekensiń degen sóz bar ǵoı. Túısik degen bul sózge jatpaıdy. Menińshe, sezim degen durys sııaqty. Mende ol bar», - dedi QR Prezıdenti.
