Elbasy Semeıdiń qaraǵaıly ormanyn qorǵaý máselesin sheshýdi tapsyrdy
sp;ASTANA. Qarashanyń 13-i. QazAqparat /Jasulan Amanbaıuly/ - Teńdesi joq tabıǵı aýmaq- Semeıdiń qaraǵaıly ormanyn órt pen zańsyz kesýden qorǵaýǵa qatysty tikeleı jeli barysynda qoıylǵan saýaldan keıin QR Prezıdenti Nursultan Nazarbaev Aýyl sharýashylyǵy mınıstrligi jáne Semeı oblysynyń, Semeı qalasynyń ákimdikterine osy máseleni sheshýdi tapsyrdy,
dep habarlaıdy QazAqparat.
N. Nazarbaevtyń atap kórsetkenindeı, memleket bul problemadan habardar jáne qoldan kelgenniń bárin jasaýda.
«2003 jyly burynǵy orman sharýashylyǵynyń negizinde «Semeı ormany» atty qoryq qurylǵanyn bilesizder. Mende bar málimetter boıynsha, sońǵy jyldary orman ósimi 50 paıyzǵa artty. Orman alqabynyń jalpy kólemi 9 myń gektarǵa kóbeıdi. Órt oqıǵalary 5 esege deıin azaıyp otyr. Orman aǵashtaryn zańsyz kesý faktileri 4,5 esege azaıdy. Bul tipti de qýanarlyq kórsetkish emes, aǵashtardy kesý múldem bolmaýy kerek», dep qadap aıtty.
«Men Astana aınalasyna úlken qıyndyqpen orman otyrǵyzýǵa kúsh-qaıratymdy ketirip júrmin. Keıin bul orman Býrabaı ormanymen qosylsyn degen mindet qoıyp otyrmyn. Astananyń mańynda 50 myń gektar orman shýyldap tur. 1997 jyly birinshi aǵashtary otyrǵyzylǵan bolsa, qazir olar 15-20 metrge deıin uzaryp ósip, elikter meken ete bastady. Al Semeıde ǵasyrlar boıy ósip kelgen orman qyrqylýda. Bul durys emes. Men Aýyl sharýashylyǵy mınıstrligine jáne oblys ákimine Semeı ormany máselesin taǵy bir zerttep, ony qorǵaýǵa qatysty usynystardy jasaqtaýǵa tapsyrma beremin», dedi Elbasy.
