Elbasy saılaýda qoldaý kórsetkeni úshin Assambleıa músheleri men barsha qazaqstandyqtarǵa rızashylyq bildirdi
ASTANA. 18 sáýir. QazAqparat /Qanat Mámetqazyuly/ - Búgin Astanadaǵy Beıbitshilik pen kelisim saraıynda ótip jatqan Qazaqstan halqy Assambleıasynyń 17-nshi sessııasynda Elbasy, Assambleıa Tóraǵasy Nursultan Nazarbaev alqaly jıyndy ashyp, sóz sóıledi.
Memleket basshysy eń aldymen jıynǵa qatysýshylardy sessııanyń ashylýymen quttyqtap, «tarıhı sessııanyń búgingi mańyzy aıryqsha ekendigin» atap ótti. «Taıaýda elimizde kezekten tys prezıdenttik saılaý ótkeni barshańyzǵa málim. Ulysty uıystyra túsken bul saılaýda maǵan, osy otyrǵan bárimizge halyq taǵdyryn senip tapsyrdy. Bizge tapsyrdy. Bul el birligin kórsetetin saılaýda álem aldynda úlken bedel aldyq. Saılaý kezinde Assambleıa músheleri men etnomádenı toptardyń ókilderi qaltqysyz qoldaý bildirdi. Sondyqtan da Assambleıa músheleri men barsha qazaqstandyqtarǵa shynaıy rızashylyǵymdy bildirýge ruqsat etińizder», -dedi Elbasy.
