Elbasy Sátbaev atyndaǵy QazUTZÝ rektoryn qabyldady
ASTANA. QazAqparat - Memleket basshysy Nursultan Nazarbaev Q.I.Sátbaev atyndaǵy Qazaq ulttyq tehnıkalyq zertteý ýnıversıtetiniń rektory Eskendir Beısembetovti qabyldady, dep habarlaıdy Aqordanyń resmı saıty.
Kezdesý barysynda Qazaqstan Prezıdentine ýnıversıtettiń damý perspektıvalary men ǵylymı-zertteý jumystarynyń nátıjeleri jóninde málimet berildi.
Nursultan Nazarbaev oqý ornynyń otandyq bilim berý júıesinde erekshe oryn alatynyn atap ótip, ındýstrııalandyrý baǵdarlamasynyń talaptaryna sáıkes joǵary bilikti mamandar daıarlaýdyń mańyzdylyǵyn aıtty.
- Qanysh Sátbaev atyndaǵy Ulttyq tehnıkalyq ýnıversıtet - ınjener maman daıarlaıtyn eń iri oqý oryndarynyń biri. Biz ony damytý úshin qajetti jaǵdaıdyń bárin jasap kelemiz. Ýnıversıtetke derbestik berilgen. Sonymen qatar, bul oqý ordasy zertteý ýnıversıtetine aınaldy, - dedi Qazaqstan Prezıdenti.
E.Beısembetov qoldanbaly jobalardy júzege asyrý úshin qabyldanyp jatqan sharalardy, sondaı-aq álemdik úrdisterdi eskere otyryp, bilim berý sapasyn arttyrý úshin atqarylǵan jumystar jóninde baıandady.
