Elbasy «Samuryq-Qazyna» qorynyń jańarǵan Damý strategııasy men Transformatsııalaý baǵdarlamasyn qoldady

ASTANA. QazAqparat - Búgin Nursultan Nazarbaev «Samuryq-Qazyna» ulttyq ál-aýqat qoryn basqarý jónindegi keńes otyrysy barysynda qordyń 2018-2028 jyldarǵa arnalǵan jańarǵan Damý strategııasymen jáne Transformatsııalaý baǵdarlamasymen tanysyp, maquldap, onyń ári qaraı júzege asyrylýyn erekshe baqylaýǵa alýdy tapsyrdy.

Jıynǵa «Samuryq-Qazyna» AQ, QR Úkimeti, ulttyq kompanııalar men kásiporyndardyń jetekshileri qatysty.

Kezdesýdi ashqan Nursultan Nazarbaev ulttyq ekonomıkany nyǵaıtý jáne odan ári damytý isinde «Samuryq-Qazyna» jumysynyń strategııalyq mańyzǵa ıe bolyp otyrǵanyn atap ótti jáne Qordy damytý úshin atqarylǵan jumystarǵa oń baǵa berip, buǵan deıin qabyldanǵan baǵdarlamalardy qazirgi jaǵdaılarǵa sáıkes jańartý qajettigin aıtty.

«Samuryq-Qazyna» ulttyq ál-aýqat qory el ekonomıkasynda mańyzdy ról atqarady. Qordy damytý jónindegi alǵashqy uzaq merzimdi strategııa 2012 jyly qabyldandy. Ol álemdik qarjy daǵdarysynyń saldaryna qarsy turý maqsatymen ázirlengen bolatyn. Sońǵy jyldary ahýal ózgerdi. Ekonomıkamyz syrtqy faktorlardyń áserine tótep berip, ornyqty damý jolyna tústi. Kóp jumys atqaryldy, - dedi ol.

Prezıdent «Samuryq-Qazyna» jumysynyń qazaqstandyqtardyń turmysyn jaqsartýǵa jáne el ekonomıkasyn kóterýge baǵyttalýy kerek ekendigine basa mán berdi.

«Damýdyń jańa strategııasy men Transformatsııalaý baǵdarlamasy Qor jumysynyń tıimdiligin arttyryp qana qoımaı, ulttyq ekonomıkanyń odan ári damýyna da yqpal etedi. Osyǵan oraı Úkimet Qor basshylyǵymen birlesip, osy baǵdarlamalardy júzege asyrý baǵytynda belsendi jumys júrgizýi qajet», - dedi Nursultan Nazarbaev.

Otyrys barysynda «Samuryq-Qazyna» aktsıonerlik qoǵamy dırektorlar keńesiniń tóraǵasy - Premer-Mınıstr Baqytjan Saǵyntaev, «Samuryq-Qazyna» aktsıonerlik qoǵamy basqarmasynyń tóraǵasy Ahmetjan Esimov, «Samuryq-Qazyna» AQ táýelsiz dırektory Rıchard Evans esepterin usyndy.