Elbasy respýblıka boıynsha ortasha alǵanda aýyzsýǵa qoljetimdilik 2020 jyly 100 paıyzǵa jýyqtaýy tıis tigin aıtty
ASTANA. 28 qańtar. QazAqparat /Rýslan Ǵabbasov/ - Búgin Elbasy Nursultan Nazarbaev Qazaqstan halqyna arnaǵan Joldaýynda respýblıka boıynsha ortasha alǵanda aýyzsýǵa qoljetimdilik 2020 jyly 100 paıyzǵa jýyqtaýy tıistigin atap kórsetti.
«Qazaqstandaǵy sapaly aýyzsýmen qamtamasyz etý máselesi halyqtyń densaýlyǵyn saqtaýdyń asa mańyzdy mindeti. Sondyqtan bul bizdiń basymdyǵymyz bolmaq»,- dep atap ótti Memleket basshysy.
Elbasy sapaly aýyzsýmen qamtamasyz etýdegi jumys 8 jyl buryn bastalǵanyn ári ońdy ister atqarylǵandyǵyn aıta kele, aýyldyq eldi mekenderde ortalyqtandyrylǵan sýmen qamtýǵa qol jetkizý 41 paıyzǵa deıin, qalada 72 paıyzǵa deıin óskenin eske salyp ótti. «Buǵan deıin ne bolǵanyn bilesizder. Tasymal sýdy paıdalanatyn adamdar sany 4 esege azaıdy. Soǵan qaramastan, sýmen qamtý júıesin jaqsartýǵa muqtaj adamdar aýylda áli de az emes. Sýmen qamtý júıesiniń tozýy qalalarda 60 paıyzdy quraıdy. Respýblıka boıynsha ortasha alǵanda aýyzsýǵa qoljetimdilik 2020 jyly 98 paıyzǵa jetýi tıis»,- dep atap ótti N. Nazarbaev.
Osy oraıda Prezıdent sýdyń sapasy barlyq belgilengen sanıtarlyq normalarǵa jaýap berýi tıis ekendigin qadap aıtty. "Sondyqtan Úkimetke sý sharýashylyǵy sektoryna jeke kapıtaldy barynsha tartý úshin tıimdi yntalandyrýdy tapsyramyn",- dedi Elbasy.
Munymen qosa Memleket basshysy jerasty sýlarynyń áleýetin keńinen paıdalaný, sýmen qamtýdyń jańa jelilerin salý kezinde de júıeli qaǵıdatty qoldaný kerektigin aıtty. «2020 jyly ortalyqtandyrylǵan sýmen qamtýǵa qol jetkizý qalalarda 100 paıyzdy quraýy tıis. Al aýyldyq jerlerde bul kórsetkish 2 esege artyp, 80 paıyzǵa jetýi kerek»,- dedi N. Nazarbaev.
