Elbasy Reseı jáne Tatarstan jastaryn Nazarbaev Ýnıversıtetinde bilim alýǵa shaqyrdy

QAZAN. QazAqparat - Qazaqstan Respýblıkasynyń Prezıdenti Nursultan Nazarbaev Qazan federaldyq ýnıversıtetinde sóılegen sózinde bilim týraly, respýblıkanyń bilim salasyndaǵy mindetteri jaıly aıtty.

Memleket basshysy «Úsh tuǵyrly til» jobasynyń iske asyrylýy men Qazaqstandaǵy barlyq mektepte ІT-tehnologııalardy engizýdiń barysyna toqtaldy.

«Bilim berý júıesiniń barlyq deńgeıinde «Úsh tuǵyrly til» jobasy iske asyrylyp jatyr. Barlyq mektepterde oqýshylar qazaq, orys jáne aǵylshyn tilinde bilim alyp jatyr. Ekonomıkany damytýǵa, ınnovatsııalarǵa, zamanaýı bilim berý tehnologııalaryna erekshe nazar aýdarylýda. Mektepterde ІT-tehnologııalaryn engizý memlekettik saıasat dárejesine kóterilgen», - dedi Elbasy.

Memleket basshysy búgingi tańda Qazaqstanda 20 zııatkerlik mektebi ashylǵanyn jetkizdi.

«Indýstrıaldy-ınnovatsııalyq damý qarqynyn eskere otyryp, tehnıkalyq jáne kásiptik bilimniń qurylymy men mazmunyn jańǵyrtýdy qolǵa aldyq. Qazaqstannyń bilim berý salasyndaǵy eń iri joba álemdik deńgeıdegi «Nazarbaev Ýnıversıteti» boldy», - dedi QR Prezıdenti.

Ýnıversıtettiń zamanaýı ǵylymı-tehnıkalyq áleýeti týraly aıta kele, Elbasy Reseı men Tatarstan jastaryn «Nazarbaev Ýnıversıtetinde» bilim alýǵa shaqyrdy.

Budan tys, Memleket basshysy L.N. Gýmılev atyndaǵy Eýrazııa ulttyq ýnıversıteti, ál-Farabı atyndaǵy Qazaq Ulttyq ýnıversıteti, Qazaqstan menedjment, ekonomıka jáne boljaý ınstıtýty, t.b. joǵary oqý oryndary týraly aıtty.