Elbasy Reseı, AQSh jáne Qytaı arasyndaǵy geosaıası básekelestik týraly aıtty

ASTANA. QazAqparat - Daǵdarys jaǵdaıyndaǵy túsinispeýshilik pen jańsaqtyq áskerı teketireske alyp kelýi múmkin. Bul týraly búgin elordada ótip jatqan Astana klýbynyń jalpy otyrysynda QR Prezıdenti  Nursultan Nazarbaev aıtty, dep habarlaıdy QazAqparat tilshisi.

«Reseı, AQSh jáne Qytaı Halyq Respýblıkasy arasyndaǵy geosaıası básekelestiktiń kúsheıýi jahandyq turǵyda ǵana emes, sonymen birge Úlken Eýrazııa perımetrinde de oryn alyp jatyr. Osynaý strategııalyq úshtaǵandaǵy kúrdeli sát, eger tarıhty eske alsaq, barlyq ýaqytta da bolǵan. Degenmen, olardyń basqarýshylyq deńgeıi sońǵy jyldary kúrt tómendep barady», - dedi Qazaqstan Prezıdenti.

Elbasynyń paıymynsha, endigi ýaqyttaǵy daǵdarystyń aýqymy buryn-sońdy bolmaǵan deńgeıde oryn alýy yqtımal.

«Keń aýqymdaǵy janjaldarǵa deıin órshýge qabiletti oqıǵalardyń yqtımaldyǵy eselep óse túsedi. Daǵdarys jaǵdaıyndaǵy túsinispeýshilik pen jańsaqtyq áskerı teketireske alyp kelýi múmkin», - dedi Nursultan Nazarbaev.

Aıta keteıik, Elbasy jıyn barysynda Úlken Eýrazııanyń sulbasy qalyptasyp kele jatqanyn aıtqan bolatyn.